कालिन्चोक हाइड्रोपावरको १३ लाख ७५ हजार कित्ता सेयर निष्कासन, कसले दिन पाउँछन् आवेदन?

काठमाडौं । कालिन्चोक हाइड्रोपावरले आजदेखि आयोजना प्रभावित क्षेत्रका बासिन्दा तथा वैदेशिक रोजगारीमा रहेका नेपालीका लागि प्राथमिक सार्वजनिक निष्कासन (आईपीओ) खुला गरेको छ ।

कम्पनीले ५५ करोड रुपैयाँ जारी पुँजीको २५ प्रतिशत बराबर १३ करोड ७५ लाख रुपैयाँको १३ लाख ७५ हजार कित्ता साधारण सेयर निष्कासन गर्न अनुमति पाएको थियो ।

त्यसअन्तर्गत पहिलो चरणमा ५ करोड ५० लाख रुपैयाँ बराबरका ५ लाख ५० हजार कित्ता सेयर आयोजना प्रभावित स्थानीयका लागि छुट्याइएको छ । दोलखा जिल्लाको बिगु गाउँपालिका–८ तथा कालिन्चोक गाउँपालिका–१ र २ का बासिन्दाले आवेदन दिन सक्नेछन् ।

त्यस्तै सर्वसाधारणका लागि छुट्याइने सेयरमध्ये १० प्रतिशत अर्थात् ८२ लाख ५० हजार रुपैयाँ बराबरका ८२ हजार ५०० कित्ता सेयर वैदेशिक रोजगारीमा रहेका नेपालीका लागि निष्कासन गरिएको छ । श्रम स्वीकृति प्राप्त गरी विदेशमा कार्यरत नेपालीले आवेदन दिन पाउनेछन् ।

आईपीओमा न्यूनतम १० कित्ता र अधिकतम १० हजार कित्तासम्म आवेदन दिन सकिनेछ ।

स्थानीयका लागि छिटोमा फागुन २७ गते र ढिलोमा चैत १३ गतेसम्म आवेदन खुला रहनेछ । स्थानीय बासिन्दाले बिक्री प्रबन्धकका साथै सम्बन्धित बैंक तथा तोकिएका शाखा कार्यालयमार्फत आवेदन दिन सक्नेछन् ।

वैदेशिक रोजगारीमा रहेका नेपालीका लागि भने छिटोमा फागुन १७ गते र ढिलोमा फागुन २७ गतेसम्म आवेदन दिन सकिने व्यवस्था छ । वैदेशिक रोजगारीमा रहेका नेपालीले आस्बा सेवामा सहभागी बैंक तथा वित्तीय संस्थामार्फत ‘सी–आस्बा’ प्रणालीबाट वा सिडिएस एण्ड क्लियरिङ्ग लिमिटेड को ‘मेरो सेयर’ अनलाइन प्रणाली प्रयोग गरी आवेदन दिन सक्नेछन् ।

सेयर निष्कासन तथा बिक्री प्रबन्धक आरबिबि मर्चेन्ट बैंकिङ्ग रहेको छ ।

केयर रेटिङ्ग नेपालले कम्पनीलाई ‘केयरएनपी डबल बी’ इस्यूअर रेटिङ्ग प्रदान गरेको छ, जसले दायित्व बहन क्षमतामा औसत जोखिम रहेको संकेत गर्छ ।