तरलता व्यवस्थापनका लागि ४५ अर्ब रुपैयाँ निक्षेप खिच्दै राष्ट्र बैंक

काठमाडौँ । नेपाल राष्ट्र बैंकले ४५ अर्ब निक्षेप संकलन गर्ने भएको छ । केन्द्रीय बैंकले ७५ दिनको लागि ४५ अर्ब निक्षेप संकलन उपकरणको बोलकबोल तथा निष्काशन गर्ने भएको हो ।

राष्ट्र बैंकका अनुसार यो उपकरण बोलकबोल प्रणाली मार्फत मात्र खरिद गर्न सकिनेछ। बोलकबोल आज दिउँसो ३ बजेसम्म खुला रहनेछ । निक्षेपको ब्याजदर बोलकबोल प्रक्रियामार्फत निर्धारण हुनेछ । यस निक्षेपको साँवा तथा ब्याज भुक्तानी २०८३ भदौ २४ गते हुने राष्ट्र बैंकले जनाएको छ । बैंक तथा वित्तीय संस्थाले न्यूनतम १० करोड रुपैयाँ र अधिकतम आह्वान गरिएको कुल रकमसम्म आवेदन दिन सक्नेछन् । बोलपत्र ५ करोड रुपैयाँले भाग गर्दा निःशेष भाग जाने गरी पेस गर्नुपर्ने व्यवस्था गरिएको छ । बहुब्याजदरमा पनि बहुबोलकबोल गर्न सकिनेछ।

राष्ट्र बैंकका अनुसार निक्षेप संकलनका लागि आह्वान गरिएको रकम बाँडफाँट गर्दा सबैभन्दा कम ब्याजदरलाई पहिलो प्राथमिकता दिइनेछ र सोही क्रमअनुसार आह्वान गरिएको रकमसम्म बाँडफाँट गरिनेछ। यसरी संकलन गरिएको रकम सम्बन्धित बोलवालाको लगानी पोर्टफोलियोमा रहनेछ।

उक्त रकमलाई अनिवार्य नगद मौज्दात (सीआरआर) मा गणना गर्न पाइने छैन, तर राष्ट्र बैंकको निर्देशनअनुसार कायम राख्नुपर्ने एसएलआर तथा तरलता अनुपातमा भने गणना गर्न पाइने व्यवस्था गरिएको छ ।