निर्जीवन बीमाको व्यापार २२.८२ प्रतिशतले बढ्यो, एनएलजीको छलाङ सबैभन्दा उच्च

काठमाडौं । चालु आर्थिक वर्ष २०८३/०८४ को पहिलो त्रैमासमा निर्जीवन बीमा कम्पनीहरूको व्यवसायमा उल्लेख्य वृद्धि देखिएको छ । गत आर्थिक वर्षको सोही अवधिको तुलनामा चालु आवको साउनदेखि असोजसम्म निर्जीवन बीमा कम्पनीहरूको व्यापार २२.८२ प्रतिशतले बढेको हो ।

नेपाल बीमा प्राधिकरणका अनुसार १५ निर्जीवन बीमा कम्पनीले यस अवधिमा कुल १५ अर्ब ५४ करोड ५१ लाख रुपैयाँ बीमाशुल्क संकलन गरेका छन् । गत आर्थिक वर्षको पहिलो त्रैमासमा कम्पनीहरूले १२ अर्ब ६५ करोड ६४ लाख रुपैयाँ बीमाशुल्क संकलन गरेका थिए ।

कम्पनीगत रूपमा हेर्दा एनएलजी इन्स्योरेन्सको व्यवसाय वृद्धिदर सबैभन्दा उच्च देखिएको छ । कम्पनीले गत वर्षको पहिलो तीन महिनामा १ अर्ब २ करोड ५६ लाख रुपैयाँ बीमाशुल्क संकलन गरेकोमा चालु आवको सोही अवधिमा १ अर्ब ४९ करोड १८ लाख रुपैयाँ पुर्‍याएको छ । यो गत वर्षको तुलनामा ४५.४६ प्रतिशतको वृद्धि हो ।

त्यस्तै, हिमालयन एभरेष्ट इन्स्योरेन्सको व्यापार ३४.५४ प्रतिशत र आईजीआई प्रुडेन्सियल इन्स्योरेन्सको ३४.२९ प्रतिशतले बढेको छ । शिखर इन्स्योरेन्सको २९.५४ प्रतिशत, नेको इन्स्योरेन्सको २४.७५ प्रतिशत, दि ओरिएन्टल इन्स्योरेन्सको २४.६० प्रतिशत, राष्ट्रिय बीमा कम्पनीको २२.५२ प्रतिशत र सगरमाथा लुम्बिनी इन्स्योरेन्सको व्यापार २२.५० प्रतिशतले वृद्धि भएको छ ।

कुल बीमाशुल्क संकलनका आधारमा सलिको इन्स्योरेन्स पहिलो स्थानमा रहेको छ । कम्पनीले पहिलो त्रैमासमा १ अर्ब ८३ करोड ५३ लाख रुपैयाँ बीमाशुल्क संकलन गरेको छ ।

त्यस्तै, शिखर इन्स्योरेन्सले १ अर्ब ७९ करोड ३६ लाख रुपैयाँ संकलन गर्दै दोस्रो स्थान कायम गरेको छ । हिमालयन एभरेष्टले १ अर्ब ६० करोड रुपैयाँ, एनएलजीले १ अर्ब ४९ करोड रुपैयाँ र आईजीआई प्रुडेन्सियलले १ अर्ब ३३ करोड रुपैयाँ बीमाशुल्क संकलन गरेका छन् ।

यसैगरी, सिद्धार्थ इन्स्योरेन्सले १ अर्ब ३१ करोड रुपैयाँ र नेको इन्स्योरेन्सले १ अर्ब १५ करोड रुपैयाँभन्दा बढी बीमाशुल्क संकलन गरेका छन् ।