सुरुमा सकारात्मक सर्किट लागेपछि फर्किएको बजार २२.५९ अङ्क बढेर बन्द

काठमाडौँ । कारोबारको सुरुवातमा एक सय भन्दा धेरै अङ्क बढेर सकारात्मक सर्किट लागेको सेयर बजार सूचक नेपाल स्टक एक्सचेन्ज (नेप्से) बिहीबार २२ अङ्कमा बन्द भएको छ । 

कारोबार सुरु भएको तीन मिनेटमै नेप्से सूचक अघिल्लो दिनको तुलनामा १०२ अंक अर्थात् ४ प्रतिशत बढ्यो र नेप्से २६७५ अंकमा हुँदा सर्किट ब्रेक लागेर २० मिनेटका लागि कारोबार स्थगित भयो । सर्किट ब्रेकपछि खुलेको बजार भने क्रमशः झर्न थाल्यो । बजार बन्द हुँदा अन्ततः नेप्से जम्मा २२.५९ अंक मात्रै बढ्यो र नेप्से २५८२.१८ अङ्कमा सीमित भएको हो । बजारमा बिहीबार २०० कम्पनीको सेयर मूल्य बढेको छ । ४१ वटाको मूल्य घट्दा बाँकी १० वटा कम्पनीको मूल्य स्थिर छ ।

नेपाल राष्ट्र बैंकले सेयर धितोमा प्रवाह गर्ने मार्जिन प्रकृतिको कर्जाको अधिकतम एकल ग्राहक कर्जामा २५ करोडको सीमा हटाएसँगै बिहीबार बजार सकारात्मक भएको हो । सीमा हटाएपछि लगानीकर्ताहरु उत्साहित हुँदा नियमित बजार खुलेको ३ मिनेटमा नै ४ प्रतिशत बढेर सकारात्मक सर्किट लागेको थियो । सर्किट लागेर २० मिनेट कारोबार स्थगित भएपश्चात खुलेको बजारले भने सोही क्रमलाई निरन्तरता दिन सकेन । फलस्वरुप नेप्से सामान्य अंक बढेर बन्द हुन पुग्यो ।

नेप्से बढेपनि बिहीबार  कारोबार रकम भने घटेको छ । बुधबार ५ अर्ब ७६ करोडको शेयर खरिदबिक्री भएको बजारमा बिहीबार ५ अर्ब २७ करोड ३२ लाख २१ हजार रुपैयाँबराबरको १ करोड १८ लाख ३० हजार कित्ता सेयर खरिदबिक्री भएको छ ।

विन्धवासिनी हाइड्रोपावरको मूल्य सर्वाधिक ८.२१ ले बढ्नु र थ्रिस्टार हाइड्रोपावरको ९.०९ प्रतिशतले घट्नुबाहेक उल्लेख्य घटबढ देखिएन । बिहीबार बजारमा शिवम् सिमेन्ट र युनियन हाइड्रोपावरको समान २७ करोडको कारोबार भयो । 

अर्थ मन्त्रालयले गठन गरेको पुँजी बजार सुधारसम्बन्धी समितिको प्रतिवेदन कार्यान्वयनको निर्देशनसँगै बजारमा सुधार देखिएको हो ।