नेप्सेमा सामान्य सुधार, कारोबार रकम साढे ५ अर्बभन्दा बढी

काठमाडौं । अघिल्लो कारोबार दिन भारी अंकले घटेको शेयर बजारमा आज सामान्य सुधार देखिएको छ । मंगलबार नेप्से परिसूचक ६.६२ अंकले बढेर २ हजार ६६४.१३ विन्दुमा पुगेको छ ।

सोमबार ठूलो गिरावट बेहोरेको बजारले आज केही सुधारको संकेत देखाएको हो । पछिल्लो समय निरन्तर उतारचढाव देखिँदै आएको बजारमा आज सामान्य वृद्धि भए पनि लगानीकर्ताको अन्योल भने कायमै छ ।

आज बजारमा ५ अर्ब ६५ करोड ११ लाख ४२ हजार रुपैयाँ बराबरको शेयर कारोबार भएको छ । कारोबार भएका कम्पनीमध्ये १४३ वटाको शेयर मूल्य बढेको छ भने १२२ वटाको घटेको छ ।

पछिल्ला दिनमा बजारमा देखिएको अस्थिरता र लगानीकर्ताको खरिदबिक्री प्रवृत्तिले नेप्सेको चाल प्रभावित हुँदै आएको छ । आज केही कम्पनीको शेयरमा खरिद आकर्षण देखिए पनि समग्र बजारमा उल्लेख्य सुधार हुन सकेको छैन । लगानीकर्ताले बजारमा स्थायित्व, नीतिगत स्पष्टता र लगानीमैत्री वातावरणको अपेक्षा गरिरहेका छन् ।