बिग मार्टबाट ४१५ रुपैयाँको सामान किनेका जनकपुरका उपभोक्ताले जिते १० लाख रुपैयाँ

काठमाडौं । बिग मार्टबाट कात्तिक ५ गते ४१५ रुपैयाँको सामान खरिद गरेका जनकपुरका एक उपभोक्ताले सरकारको करदाता प्रोत्साहन पुरस्कार योजनाअन्तर्गत १० लाख रुपैयाँको बम्पर उपहार जितेका छन् ।

अर्थ मन्त्रालयमा सोमबार आयोजित ‘कात्तिक महिनाको पहिलो पाक्षिक करदाता प्रोत्साहन पुरस्कार कार्यक्रम’ अन्तर्गत गरिएको लक्की ड्रबाट ती उपभोक्ता बम्पर पुरस्कारका लागि छनोट भएका हुन् ।

सरकारले उपभोक्तालाई सामान खरिद गर्दा अनिवार्य रूपमा बिल लिने बानीको विकास गराउने उद्देश्यले यो योजना सञ्चालन गर्दै आएको छ । कात्तिक १ देखि १५ गतेसम्म जारी भएका बिलमध्येबाट १५ जना दैनिक विजेता र एक जना बम्पर विजेता गरी १६ जना छनोट गरिएको मन्त्रालयले जनाएको छ ।

लक्की ड्रमार्फत विजेता घोषणा भएपछि कार्यक्रमस्थलबाटै उनलाई टेलिफोन गरिएको थियो । सुरुमा पुरस्कारबारे अनभिज्ञ रहेका उनले आफू नेपाल प्रिमियर लिग (एनपिएल) को जनकपुर बोल्ट्स समर्थक रहेको बताएका थिए ।

त्यसपछि कार्यक्रममा उपस्थित जनकपुर बोल्ट्सका खेलाडी तथा राष्ट्रिय क्रिकेट टोलीका सदस्य ललितनारायण राजवंशीले फोनमार्फत उनलाई बधाई दिएका थिए । कुराकानीका क्रममा विजेताले पुरस्कारस्वरूप प्राप्त हुने १० लाख रुपैयाँ घर निर्माणमा खर्च गर्ने बताए ।

आयोजकका अनुसार विजेताले कात्तिक ५ गते बिग मार्टबाट ४१५ रुपैयाँको सामान खरिद गरेका थिए । उनलाई सक्कल बिलसहित जनकपुरस्थित आन्तरिक राजस्व कार्यालयमा सम्पर्क गरी आवश्यक प्रक्रिया पूरा गर्न आग्रह गरिएको छ । आवश्यक प्रक्रिया पूरा भएपछि आगामी मंसिर १ गते काठमाडौंमा आयोजना हुने कार्यक्रममा अर्थमन्त्रीले विजेतालाई १० लाख रुपैयाँको चेक हस्तान्तरण गर्ने कार्यक्रम रहेको छ ।