अपर हेवाखोलाले पायो ५७ करोड ५० लाखको हकप्रद निष्कासन स्वीकृति

काठमाडौं । अपर हेवाखोला हाइड्रोपावर कम्पनीले १ः१ अनुपातमा हकप्रद शेयर निष्कासन गर्न विद्युत नियमन आयोगबाट पूर्वस्वीकृति प्राप्त गरेको छ । कम्पनीको १४औँ वार्षिक साधारण सभाबाट पारित प्रस्तावअनुसार आयोगले हकप्रद निष्कासनका लागि सर्तसहित स्वीकृति दिएको हो ।

कम्पनीले १५ प्रतिशत बोनस शेयर वितरणपछि कायम भएको चुक्ता पूँजी ५७ करोड ५० लाख रुपैयाँको १ः१ अनुपातमा हकप्रद शेयर जारी गर्न लागेको हो । यसअनुसार कम्पनीले ५७ लाख ५० हजार कित्ता हकप्रद शेयर निष्कासन गर्नेछ ।

हकप्रद शेयर बिक्रीबाट संकलन हुने ५७ करोड ५० लाख रुपैयाँमध्ये ५१ करोड रुपैयाँ मातृभूमि हाइड्रोपावर डेभलपमेन्ट कम्पनी प्रालिमा लगानी गरिने कम्पनीले जनाएको छ । उक्त रकम मातृभूमि हाइड्रोपावरले निर्माण गर्न लागेको सिसुवाखोला जलविद्युत आयोजनामा खर्च गरिनेछ ।

सिसुवाखोला जलविद्युत आयोजनामा अपर हेवाखोला हाइड्रोपावरको ६०.९ प्रतिशत संस्थापक शेयर स्वामित्व रहेको छ । त्यसैले हकप्रदबाट उठ्ने रकमको ठूलो हिस्सा उक्त आयोजनामा लगानी गर्न लागिएको हो ।

बाँकी ६ करोड ५० लाख रुपैयाँ भने कम्पनीले सञ्चालन गरिरहेको ८.५ मेगावाट क्षमताको अपर हेवाखोला साना जलविद्युत आयोजनाका लागि बैंक तथा वित्तीय संस्थाबाट लिएको आवधिक ऋण भुक्तानीमा प्रयोग गरिनेछ ।

विद्युत नियमन आयोगको भदौ ८ गते बसेको बैठकले कम्पनीको प्रस्तावमाथि निर्णय गर्दै सर्तसहित पूर्वस्वीकृति दिएको हो । आयोगको स्वीकृति पाएसँगै कम्पनीले अब नेपाल धितोपत्र बोर्डबाट अन्तिम स्वीकृति लिएर हकप्रद शेयर निष्कासनको प्रक्रिया अघि बढाउनेछ ।