प्रिमियममा आइपीओ निष्काशन गर्न १० कम्पनी अग्रसर, दिए धितोपत्र बोर्डमा आवेदन

काठमाडौं । पछिल्लो समय प्रिमियममा सेयर विक्री गर्न विभिन्न क्षेत्रका १० कम्पनी अग्रसर देखिएका छन् । उनीहरु प्रिमियम मूल्यसहित सेयर विक्री स्वीकृतिका लागि नेपाल धितोपत्र बोर्डमा आवेदन दिएका छन् । कम्पनीको विस्तृत अध्ययन गरि बोर्डले स्वीकृति दिएमा ति कम्पनीहरुले छिट्टै प्रिमियमा प्रारम्भिक सार्वजनिक प्रस्ताव (आइपीओ) ल्याउने छन् ।

धितोपत्र बोर्डमा परेका आवेदनअनुसार जलविद्युत क्षेत्रका दुई, लगानी समूहका १ र उत्पादनमूलक तथा प्रशोधन समूहका ७ कम्पनीले प्रिमियममा सेयर विक्री गर्न धितोपत्र बोर्डमा आवेदन दिएका हुन् । विवरणअनुसार

नुम्बुर हिमालयन हाइड्रोपावरले २१८ रुपैयाँमा ३० लाख ६ हजार २ सय २ कित्ता, सेञ्चुरी इनर्जीले २७५ रुपैयाँ ११ पैसामा ३ लाख कित्ताका लागि बोर्डमा आवेदन परेको छ । लगानी समूहतर्फ शिवम होल्डिङ्सले २१० रुपैयाँमा १ करोड १६ लाख कित्ता सेयर विक्री गर्ने प्रस्ताव गरेको छ ।

सबैभन्दा धेरै प्रिमियमा सेयर विक्री गर्न उत्पादनमूलक तथा प्रशोधन समूहमा रहने औद्योगिक प्रतिष्ठानहरुले चासो राखेका छन् । जगदम्बा स्टिल्सले ३ सय रुपैयाँमा २ करोड ७० हजार कित्ता, शौर्य सिमेन्ट इण्डष्ट्रिजले २६४ रुपैयाँ ५१ पैसामा १ करोड ५९ लाख ८१ हजार ५ सय कित्ता, मारुती सिमेन्ट्सले ३७७ रुपैयाँमा १ करोड १६ लाख कित्ता, रिद्धिसिद्धि सिमेन्टले २१४ रुपैयाँ १० पैसामा १ करोड २१ लाख ७१ हजार ५ सय कित्ता, अम्बे स्टिल्सले ३०३ रुपैयाँको प्रिमियम मूल्यमा १ करोड ११ लाख ९२ हजार ७२७ कित्ता, हुलास इन्फ्राले ३३३ रुपैयाँ ५६ पैसामा ३५ लाख ४७ हजार १८८ कित्ता र हुलास आइरन इन्डष्ट्रिजले २५५ रुपैयाँमा ९७ लाख ५० हजार किक्ता सेयर वित्री गर्न बोर्डमा आवेदन दिएका छन् । 

विगतमा प्रियियम तथा बुक बिल्डिङ विधिमार्फत उत्पादनमूलक क्षेत्रका कम्पनीलाई सरल तरिकाले आइपीओ विक्री गर्न दिइएपनि पछिल्लो केही समयदेखी प्रिमियम र बुक बिल्डिङ विधिमार्फत आइपीओ निष्काशनका लागि स्वीकृति दिइएको छैन । 

चालु आर्थिक वर्षमा १५ वटा कम्पनीलाई आइपीओ निष्काशन अनुमति दिइएकामा सबैले अिंकत मूल्य १०० रुफैयाँमा सेयर विक्री गरेका छन् । धितोपत्र बोर्डमा ८९ कम्पनी ५९ अर्ब ६९ करोड ९४ लाख रुपैयाँ भन्दा धेरैको आइपीओ अनुमति कुरेर बसेका छन् ।

त्यसमध्ये होटल तथा पर्यटन समूहको १२ वटा, हाइड्रोपावर समूहको ३४, लगानी समूहको ४, उत्पादन तथा प्रशोधन समूहको २५, लघु बीमा समूहको ३, अन्य समूहको ११ कम्पनी छन् ।