तीन दिनको वृद्धिपछि नेप्सेमा करेक्सन, घट्यो सूचकसँगै कारोबार रकम

काठमाडौँ। सरकारले सुस्त बनेको पुँजी बजारलाई चलायमान बनाउन विशेष सुधार कार्यक्रम ल्याउने घोषणा गरेपछि लगातार तीन कारोबार दिन बढेको नेप्से परिसूचकमा बुधबार भने घटेको छ । छोटो अवधिमा बजारमा आएको तीव्र वृद्धिपछि नाफा सुरक्षित गर्न लगानीकर्ता बिक्रीतर्फ लाग्दा नेप्से २१ अंकभन्दा बढीले घटेको हो ।

आज नेप्से परिसूचक २१.१९ अंक घटेर २६१२.४२ विन्दुमा झरेको छ । त्यस्तै, सेन्सेटिभ इण्डेक्स ३.७७ अंक घटेको छ भने फ्लोट इण्डेक्स १.५० अंक र सेन्सेटिभ फ्लोट इण्डेक्स १.३२ अंक घटेको छ । नेप्सेसँगै आज कारोबार रकम पनि घटेको छ। अघिल्लो कारोबार दिन अर्थात मंगलबार ८ अर्ब २९ करोड रुपैयाँको सेयर खरिदबिक्री भएको बजारमा आज ५ अर्ब ३८ करोड ९५ लाख रुपैयाँबराबरको सेयर कारोबार भएको छ । 

आज नारायणी डेभलपमेन्ट बैंकको सेयरमूल्य सर्वाधिक ६.३७ प्रतिशत बढेको छ । त्यस्तै,हिमाल दोलखा हाइड्रोपावर कम्पनीको सेयरमूल्य करिब साढे ५ प्रतिशत बढेको छ। कारोबारमा आएको एनएमबी हाइब्रिड फण्ड एल २ को इकाईमूल्य सर्वाधिक ७.७३ प्रतिशत घटेको छ भने रिज लाइन इनर्जीको सेयरमूल्य ५ प्रतिशतभन्दा बढी घटेको छ ।

कारोबार रकमका आधारमा हिमाल दोलखा हाइड्रोपावर कम्पनी शीर्ष स्थानमा रहेको छ । यस दिन सो कम्पनीको ३७ करोड ९५ लाख ६४ हजार रुपैयाँबराबरको सेयर कारोबार भएको छ । त्यस्तै, यस दिन रिलायन्स स्पिनिङ्ग मिल्सको २५ करोड रुपैयाँभन्दा बढीको सेयर किनबेच भएको छ । 

बुधबार नेप्सेका १३ वटै उपसमूहको परिसूचक घटेका छन्। जलविद्युत् उपसमूहमा सबैभन्दा बढी दबाब देखिएको छ। उक्त उपसमूहको परिसूचक १.०४ प्रतिशतले घटेको छ। जीवन बीमा उपसमूहको परिसूचक पनि १ प्रतिशतभन्दा बढी घटेको छ। निर्जीवन बीमा उपसमूहको परिसूचक करिब १ प्रतिशतले घटेको छ।

बुधबार कारोबारमा आएका मध्य ४२ कम्पनीको सेयर मूल्य बढ्दा २२५ कम्पनीको घटेको छ । यस्तै, १२ कम्पनीको सेयर मूल्य भने स्थिर छ ।