आर्थिक संकट भन्दै सरकारले रोक्यो निजी अस्पतालमा स्वास्थ्य बीमा, तिर्नुपर्ने बक्यौता पुग्यो १६ अर्ब

काठमाडौं । सरकारले स्वास्थ्य बीमा कार्यक्रममा आबद्ध निजी स्वास्थ्य संस्थाहरूबाट प्रदान गरिने स्वास्थ्य बीमाका सेवा कटौती गरेको छ । स्वास्थ्य बीमा बोर्डले बढ्दो वित्तीय संकटलाई कारण देखाउँदै निजी अस्पतालहरूबाट उपलब्ध गराइने आकस्मिक बाहेकका अन्य सेवाहरूमा स्वास्थ्य बीमा रोक्ने निर्णय गरेको हो ।

जेठ ११ गते बसेको बोर्डको बैठकले जेठ १६ गतेदेखी लागू गर्नेगरि निर्णय लिएको हो । सेवा प्रदायक अस्पतालहरूलाई यसबारे पत्र पठाइएको बोर्डले जानकारी गराएको जनाएको छ । बोर्डका निमित्त कार्यकारी निर्देशक शकुन्तला प्रजापतिद्वारा जारी सूचनामा अर्को निर्णय नभएसम्म निजी स्वास्थ्य संस्थाबाट प्रदान गरिने गैर(आकस्मिक बीमा सेवा स्थगित गरिएको उल्लेख छ ।

बोर्डको यो निर्णयसँगै देशभर स्वास्थ्य बीमा कार्यक्रममा आबद्ध रहेका सयौं निजी अस्पताल, मेडिकल कलेजबाट बीमित नागरिकले पाउँदै आएको ओपीडी, परीक्षण, शल्यक्रिया, औषधि तथा अन्य नियमित सेवा प्रभावित हुने आशंका गरिएको छ । पछिल्लो समय स्वास्थ्य बीमा बोर्डले गम्भीर वित्तीय समस्या झेलिरहेका कारण भुक्तानी व्यवस्थापनको कठिनाइले सरकारी अस्पतालको सेवासमेत प्रभावित हुँदै आएको छ । बीमा बोर्डका अनुसार अहिलेसम्म सेवाप्रदायक सस्थालाई १६ अर्ब तिर्न बाँकी छ ।