छानबिनको घेरो कसिँदै जाँदा हिमालयन रि–इन्स्योरेन्सकी सिइओ उपासना पौडेल भारत प्रस्थान

काठमाडौँ । हिमालयन रि–इन्स्योरेन्सकी प्रमुख कार्यकारी अधिकृत (सिइओ) उपासना पौडेल विवादको अचानक मुलुक छाड्दै भारतको बैंगलोरतर्फ प्रस्थान गरेकी छन् । 

 विवादास्पद व्यवसायी तथा बिचौलिया दीपक भट्टमाथि सम्पत्ति शुद्धीकरण अनुसन्धान विभागले छानबिन प्रक्रिया अघि बढाएसँगै उनी अचानक बैंगलोर प्रस्थान गरेकी हुन् । जनआस्थामा प्रकाशित समाचारका अनुसार विभागको अनुसन्धानको दायरामा भट्टसँगै अन्य उच्च अधिकारीहरू समेत तानिने सम्भावना देखिएपछि पौडेल डेढ साताको बिदा स्वीकृत गराएर भारत गएकी हुन् ।

यो घटनाक्रमको पृष्ठभूमिमा हिल्टन होटलको बीमा दाबी भुक्तानी प्रकरण जोडिएको छ। जेनजी आन्दोलनका क्रममा भएको तोडफोड र आगजनीपछि हिल्टन होटलको बीमा दाबीमा अनियमितता भएको भन्दै बीमा प्राधिकरणले सिइओ पौडेललाई २ लाख रुपैयाँ जरिवानासहित कारबाही गरिसकेको छ । चैत ६ गते बसेको प्राधिकरणको सञ्चालक समिति बैठकले हिमालयन रि-इन्स्योरेन्स र हिमालयन लाइफ इन्स्योरेन्सलाई कारबाही गर्नुका साथै एलियन्ट पुनर्बिमा ब्रोकरको इजाजतपत्र तीन महिनाका लागि निलम्बन गर्ने निर्णय गरेको थियो । यी तीनवटै संस्थाहरूमा विवादास्पद व्यवसायी दीपक भट्टको प्रत्यक्ष वा अप्रत्यक्ष लगानी रहेको पाइएको छ ।

प्राधिकरणको प्रारम्भिक अनुसन्धानले हिल्टन होटलको ‘हुलदंगा तथा आतंकवाद जोखिम’ अन्तर्गतको पुनर्बीमा दायित्वमा गम्भीर कानुनी उल्लंघन भएको देखाएको छ । विशेषगरी, हिमालयन रि(इन्स्योरेन्सले व्यहोर्नुपर्ने ठूलो हिस्साको दायित्व सरकारी स्वामित्वको नेपाल रि-इन्स्योरेन्समा सारेर निजी कम्पनीलाई फाइदा पुर्‍याउन खोजिएको आरोप छ । हिल्टन होटलमा भएको करिब ४ अर्ब रुपैयाँको क्षतिमध्ये हिमालयन रि-इन्स्योरेन्सले २ अर्ब २५ करोड व्यहोर्नुपर्नेमा पछि सो माग दाबीलाई सरकारी कम्पनी नेपाल रि तर्फ मोड्न खोजिएको भेटिएको हो । यस प्रक्रियामा नेपाल रि-इन्स्योरेन्सको उच्च व्यवस्थापनले समेत भट्टको स्वार्थ अनुकूल कार्य गरेको आशंका गरिएको छ ।

यसैगरी, हिमालयन रि-इन्स्योरेन्सका अध्यक्ष शेखर गोल्छाले यसअघि नै पदबाट राजीनामा दिइसकेका छन् । यसैबीच, भट्टले दोस्रो बजारबाट हिमालयन रिको सेयर खरिद गर्न सोही कम्पनीको चेक प्रयोग गरी करोडौँ रुपैयाँ भुक्तानी गरेको तथ्य समेत बाहिरिएको छ । उक्त शंकास्पद वित्तीय कारोबारमा सिइओ पौडेलले सहयोग पुर्‍याएको हुनसक्ने आशंकामा नियामक निकाय र अनुसन्धान विभागले गहिरो निगरानी गरिरहेका छन् । हालको यो पलायनलाई धेरैले अनुसन्धानबाट जोगिने प्रयासको रूपमा हेरेका छन् ।