जेनजी आन्दोलनको त्रास छिचोल्दै अघि बढ्यो सेयर बजार, पौने १४ अर्बको कारोबार

काठमाडौं । सेयर बजार मापक नेपाल स्टक एक्सचेन्ज (नेप्से) आइतबार उच्च अंकले बढेको छ । साताको पहिलो दिन आइतबार नेप्से ५७.५५ अंकले बढेर २७७२.१७ अंकमा पुगेको छ । गत सातादेखी नै बृद्धिको पक्षमा देखिएको नेप्से आइतबार झन् उच्च अंकले बढेको हो । नेप्से बढ्दै गर्दा २०८२ भदौ १२ गतेको उचाई हाराहारी पुगेको छ । त्यसदिन नेप्से २७८१ अंकमा रोकिएको थियो । 

भदौ २३ र २४ गतेको जेनजी आन्दोलनपछि निरन्तर खस्किएको नेप्से २०८२ पुस ७ गते पछिल्लो समयकै न्यून २५८१.२१ अंकसम्म झरेको थियो । तर, विस्तारै फागुन २१ मा आमनिर्वाचन हुने निश्चिचता देखिएसँगै पछिल्लो समय नेप्सेमा चमक देखिँदै आएको छ । पुस ७ मा न्यून विन्दु समाएपछि अधिकतर नेप्से बढ्ने र न्यून रुपमा घट्ने हुँदै एक महिनाको अवधिमा करीव २०० अंकले बढेको छ ।

नेप्सेसँगै कारोबार रकममा पनि सुधार देखिएको छ । आइतबार १३ अर्ब ७८ करोड ५७ लाख रुपैयाँबराबरको सेयर खरिद विक्री भएको छ । यसअघि गत साता माघ ६ गते ११ अर्ब ७३ करोड ७९ लाख रुपैयाँ बराबरको सेयर किनबेच भएको थियो । त्यसअघि २०८२ साउन १५ मा १५ अर्ब ३५ करोडको सेयर कारोबार भएको थियो भने साउन १८ गते १२ अर्ब ८४ करोड रुपैयाँको सेयर किनबेच भएको थियो ।

आइतबार १३ वटै समूह सूचक बढेको छ । जसमध्ये होटल तथा पर्यटन समूह सूचक सर्वाधिक ३.३५ प्रतिशत बढेको छ । त्यस्तै, जलविद्युत, लगानी, जीवन बीमा र उत्पादन तथा प्रशोधन समूह सूचक २ प्रतिशतभन्दा बढी बढेको छ ।

आइतबार ९ स्टकको सेयर सकारात्मक सर्किट लेभलमा कारोबार भएको छ । एसवाई प्यानल नेपाल, श्रीनगर एग्रीटेक, नेपाल माइक्रो इन्स्योरेन्स, बन्दीपुर केवबलकार, हिमस्टार उर्जा, माबिलुङ्ग इनर्जी, रिलायन्स फाइनान्स, आँखु खोला जलविद्युत कम्पनी र त्रिशुली जलविद्युत कम्पनीको सेयर सकारात्मक सर्किट लेभलमा कारोबार भएको हो । त्यस्तै, क्रेष्ट माइक्रो लाइफ इन्स्योरेन्स र नेपाल वेयरहाउजिङ्गको शेयरमूल्य करिब १० प्रतिशत बढेको छ । कारोबारमा आएको १०.५० प्रतिशत एभरेष्ट बैंक डिबेञ्चर २०८५ को मूल्य सर्वाधिक ५.८० प्रतिशत घटेको छ ।