माओवादी नेता-कार्यकर्ताको सम्पत्ति छानविन गरिने, नेपोटिजमबारे कार्यविधि बनाउने

काठमाडौं । नेकपा माओवादी केन्द्रको सातौं पूर्ण बैठकले पार्टी भित्रका नेता–कार्यकर्ताको सम्पत्ति छानविन गर्न शक्तिशाली आयोग गठन गर्ने निर्णय गरेको छ । अध्यक्ष पुष्पकमल दाहालको अध्यक्षतामा बसेको केन्द्रीय समिति बैठकले  पार्टी भित्रका नेता–कार्यकर्ताको सम्पत्ति छानविन गर्न शक्तिशाली आयोग गठन गर्ने निर्णय गरेको हो ।

बैठकले केन्द्रीय समिति दाहालको संयोजकत्वमा महाधिवेशन आयोजक समितिमा रूपान्तरण गर्ने, पदाधिकारी आयोजक समितिको सचिवालयमा रूपान्तरित हुने र महाधिवेशन मंसिरमा गर्ने निर्णय गरेको छ ।

यस्तै बैठकले नेपोटिजमबारे कार्यविधि बनाएर नेताका पारिवारिक सदस्यहरूका बारेमा निर्णय लिने र संस्कार, कार्यशैली र चालचलन सम्बन्धी नीति बनाउने निर्णय गरेको छ ।

जेनजीलाई पार्टीका सबै समितिमा अधिकतम सहभागी गर्ने, युवाहरूलाई प्रथामिकता दिने, आईटी कामलाई उच्च प्राथामिकतामा राखेर काम गर्ने निर्णय गरेको छ । बैठकले अध्यक्ष दाहालको प्रस्ताव पारित गर्दै वरिष्ठ उपाध्यक्ष र उपमहासचिवले राखेको प्रस्ताबलाई त्यसैमा समेट्ने र विचार मिल्ने पार्टीहरूसॅग एकता गर्ने निर्णय गरेको छ ।

यसअघि अध्यक्ष दाहालले पार्टीको केन्द्रीय समिति बैठकलाई सम्बोधन गर्दै सम्पत्ति छानबिन आयोग गठन गर्ने र सबै नेताको सम्पत्ति सार्वजनिक गर्ने घोषणा गरेका थिए । पार्टीका सबै तहका नेतृत्व र पदाधिकारीले परिवार, सचिवालय तथा कार्यकर्ताको व्यवस्थापनमा नयाँ कार्यशैली अपनाउनुपर्ने आवश्यकता औंल्याउँदै अध्यक्ष दाहालले अब पार्टी पुरानै पद्दतिले नचल्ने भएकाले नयाँ कार्यविधि र नयाँ ढंगबाट अघि बढ्ने बताएका थिए ।