काठमाण्डु गोर्खाजमाथि जनकपुरको शानदार जित
.jpg)
मोइनलाई साथ दिएका सैफ हसनले ३९ बलमा अविजित ४० रन बनाए। यी दुईले तेस्रो विकेटका लागि ७९ रनको अविजित साझेदारी गर्दै जनकपुरलाई सहज जित दिलाए ।
काठमाडौं । मोइन अलीको उत्कृष्ट अर्धशतक र राहुल यादवको घातक बलिङको मद्दतमा जनकपुर बोल्ट्सले तेस्रो संस्करणको नेपाल प्रिमियर लिग (एनपीएल) मा पहिलो जित निकालेको छ। जनकपुरले काठमाण्डु गोर्खाजलाई ८ विकेटले पराजित गर्दै प्रतियोगितामा जितको खाता खोलेको हो ।
काठमाण्डुले दिएको ११६ रनको लक्ष्य जनकपुरले १७ ओभर २ बलमा २ विकेट गुमाएर पूरा गर्यो । जनकपुरको जितमा ओपनर मोइन अलीले ५१ बलमा ५८ रन बनाउँदै अविजित रहे। उनले आफ्नो इनिङ्समा ३ चौका र ३ छक्का प्रहार गरे ।
मोइनलाई साथ दिएका सैफ हसनले ३९ बलमा अविजित ४० रन बनाए । यी दुईले तेस्रो विकेटका लागि ७९ रनको अविजित साझेदारी गर्दै जनकपुरलाई सहज जित दिलाए ।
जनकपुरले ७ रन जोड्दा पहिलो विकेटका रूपमा तृतराज दासलाई गुमाएको थियो । तृत ५ रनमा आउट भए । त्यसपछि ३७ रनको अवस्थामा मयन यादव ९ रन बनाएर पभेलियन फर्किए । तर, मोइन र सैफले जिम्मेवारीपूर्ण ब्याटिङ गर्दै टोलीलाई जितसम्म पुर्याए। काठमाण्डुका रिपोन मोन्डलले एक विकेट लिए ।
यसअघि त्रिवि क्रिकेट मैदानमा टस जितेर पहिले ब्याटिङ गरेको काठमाण्डु गोर्खाज १९ ओभर ३ बलमा ११५ रनमा अलआउट भएको थियो ।
काठमाण्डुलाई कम योगफलमा समेट्ने क्रममा जनकपुरका आइकोनिक खेलाडी राहुल यादवले उत्कृष्ट प्रदर्शन गरे। उनले ४ ओभरमा ३१ रन खर्चिएर ४ महत्वपूर्ण विकेट लिए। राहुलले दुवै ओपनर साम हिजलेट र स्मित पटेलसँगै कप्तान करण केसी तथा मोहम्मद आदिल आलमलाई आउट गरे ।
सैफ हसनले २ विकेट लिए भने मोइन अली, कप्तान हर्मीत सिंह र ललित राजवंशीले समान एक विकेट हात पारे ।
काठमाण्डुका लागि भीम सार्कीले सर्वाधिक ३३ रन बनाए । उनले २९ बलमा ४ चौका प्रहार गरे। रसिद खानले १७, स्मित पटेलले १३ र सुमित महर्जनले १० रन बनाए। कप्तान करण केसी ८, हरिशंकर शाह ९, जहानदाद खान ५ र रिपोन मोन्डल ९ रनमा आउट भए। साम हिजलेटले १ रन बनाए भने मोहम्मद आदिल आलम पहिलो बलमै आउट भए। शाहव आलम ४ रनमा अविजित रहे ।
काठमाण्डुले खेलभर कुनै पनि ठूलो साझेदारी गर्न नसक्दा लगातार विकेट गुमाएको थियो । जनकपुरको कसिलो बलिङसामु काठमाण्डुको ब्याटिङ धराशायी बन्यो ।
यसअघि पहिलो खेलमा जनकपुर कर्णाली याक्ससँग १९ रनले पराजित भएको थियो। पहिलो जितसँगै जनकपुरले प्रतियोगितामा पुनरागमन गरेको छ ।
एनपीएलअन्तर्गत आजको दोस्रो खेलमा साँझ ५ बजे विराटनगर किंग्स र कर्णाली याक्सबीच प्रतिस्पर्धा हुनेछ ।
सम्बन्धित खबर
