पूर्वमिस स्विट्जरल्यान्डले लगाईन् ट्रम्पमाथि बलात्कारको आरोप

काठमाडौं । पूर्व मिस स्विट्जरल्यान्ड तथा मोडल बियाट्रिस केउलले अमेरिकी राष्ट्रपति डोनाल्ड ट्रम्पमाथि सन् १९९३ मा आफूलाई बलात्कार गरेको आरोप लगाएकी छन् । द टेलिग्राफले सोमबार प्रकाशित गरेको समाचारअनुसार, केउलले यसअघि ट्रम्पमाथि यौन दुर्व्यवहारको आरोप लगाउँदै आएकोमा पछिल्लो पटक बलात्कारको दाबीसमेत गरेकी हुन् ।

अमेरिकी संसद्को तल्लो सदन हाउस अफ रिप्रेजेन्टेटिभ्सका डेमोक्रेटिक सांसदहरूले गरेको अनुसन्धानसम्बन्धी प्रतिवेदनमा केउलको आरोप समेटिएको समाचारमा उल्लेख छ । यद्यपि, ह्वाइट हाउसले प्रतिवेदनमा उल्लेख गरिएका आरोप अस्वीकार गरेको छ ।

ह्वाइट हाउसका एक प्रवक्ताले उक्त आरोपलाई राष्ट्रपति ट्रम्पका उपलब्धिबाट प्राप्त भइरहेको रिपब्लिकन पार्टीको राजनीतिक समर्थनबाट अमेरिकी जनताको ध्यान अन्यत्र मोड्ने डेमोक्रेटिक पार्टीको प्रयासका रूपमा टिप्पणी गरेका छन् ।

प्लाजा होटलमा भएको थियो भेट

केउलका अनुसार सन् १९९३ मा आफू २४ वर्षकी हुँदा न्यूयोर्कस्थित प्लाजा होटलमा आयोजित सौन्दर्य प्रतियोगितासम्बन्धी पत्रकार सम्मेलनका क्रममा ट्रम्पसँग भेट भएको थियो । त्यसबेला उक्त होटल ट्रम्पकै स्वामित्वमा थियो ।

प्रतिवेदनमा उल्लेख भएअनुसार, ट्रम्पले उनलाई भिसा मिलाइदिने र न्यूयोर्क विश्वविद्यालयमा भर्ना हुन सहयोग गर्ने आश्वासन दिएका थिए । केउलले ट्रम्पले आफूलाई ‘म तिम्रो हेरचाह गर्नेछु’ भनेको दाबी गरेकी छन् ।

उनका अनुसार, ट्रम्पसँगको कुराकानीपछि जेफ्री एपस्टिन नामका व्यक्ति उनीकहाँ पुगेका थिए । एपस्टिनले आफूलाई ‘डनको सबैभन्दा मिल्ने साथी’ भन्दै मार–ए–लागोमा हुने पार्टीमा सहभागी हुन निम्तो दिएको केउलको भनाइ छ । प्रतिवेदनमा एपस्टिनले ट्रम्पसँग मिलेर धेरै पार्टी आयोजना गर्ने गरेको बताएका उल्लेख छ ।

ट्रम्पका प्रतिनिधिले होटलमा बोलाएको दाबी

डेमोक्रेटिक सांसदहरूको प्रतिवेदनअनुसार, केही समयपछि ट्रम्पका एक प्रतिनिधिले केउललाई प्लाजा होटलको माथिल्लो तलामा ट्रम्पलाई भेट्न बोलाएका थिए ।

केउलले कोठामा प्रवेश गरेपछि ट्रम्पले पछाडिबाट समातेर जबर्जस्ती बलात्कार गरेको आरोप लगाएकी छन् । प्रतिवेदनमा उनको लुगा च्यातिएको र शरीरका विभिन्न भागमा चोट लाग्नुका साथै रक्तस्राव भएको दाबी पनि समेटिएको छ ।

घटनापछि ट्रम्पले आफूलाई ओछ्यानको छेउमा बसाएर भिसा र विश्वविद्यालयमा भर्नाका लागि सहयोग गर्ने आश्वासन दिएको केउलको आरोप छ । साथै, घटनाबारे कसैलाई नबताउन वाचा गराएको र ‘कार्यक्रम अघि बढ्नैपर्छ’ भनेको पनि प्रतिवेदनमा उल्लेख छ । यी विवरण केउलले लगाएका आरोप तथा प्रतिवेदनमा समेटिएका दाबी हुन् । ह्वाइट हाउसले भने आरोप अस्वीकार गरेको छ ।

सन् २०२४ मा पनि यौन दुर्व्यवहारको आरोप

केउलले सन् २०२४ को अमेरिकी राष्ट्रपतीय निर्वाचनअघि पनि सन् १९९३ मा प्लाजा होटलमा ट्रम्पले आफूलाई यौन दुर्व्यवहार गरेको आरोप लगाएकी थिइन् ।

त्यतिबेला उनले ट्रम्पले आफ्नो ओठ र घाँटीमा चुम्बन गरेको, लुगा उचाल्न खोजेको र शरीरका विभिन्न भागमा जबर्जस्ती समातेको दाबी गरेकी थिइन् ।

द टेलिग्राफका अनुसार, केउलका लामो समयदेखिका एक साथीले पनि उनले करिब २० वर्षअघि नै ट्रम्पको अनिच्छित यौन व्यवहारबारे आफूलाई सुनाएको बताएका छन् । ती साथीका अनुसार, केउलले घटनाबारे सुनाउँदै आएको विवरण त्यसयता परिवर्तन भएको छैन ।