करदाता प्रोत्साहन कार्यक्रम: बिल लिने मात्रै होइन, दिनेलाई पनि पुरस्कार दिने सरकारको तयारी

काठमाडौं । सरकारले करदाता प्रोत्साहन कार्यक्रमलाई विस्तार गर्दै वस्तु तथा सेवा बिक्री गर्ने विक्रेतालाई पनि नगद पुरस्कार दिने तयारी गरेको छ । अर्थमन्त्री डा. स्वर्णिम वाग्लेले बिल जारी गर्ने व्यवसायीलाई समेत प्रोत्साहित गर्ने व्यवस्था मिलाउन आन्तरिक राजस्व विभागलाई निर्देशन दिएका छन् ।

शुक्रबार अर्थ मन्त्रालयमा आयोजित राजस्व समीक्षा बैठकमा अर्थमन्त्री वाग्लेले बिल लिने उपभोक्तालाई मात्रै नभई बिल जारी गर्ने विक्रेतालाई पनि प्रोत्साहन गर्नुपर्ने बताएका हुन् । त्यसका लागि हालको कार्यविधि संशोधन गरी पुरस्कारको रकम र वितरण प्रक्रियासहितको प्रस्ताव पेस गर्न उनले विभागलाई निर्देशन दिएका छन् ।

सरकारले चालु आर्थिक वर्षको साउन १ गतेदेखि बिल लिने उपभोक्तालाई नगद पुरस्कार दिने कार्यक्रम सञ्चालन गर्दै आएको छ । यसबाट बिल लिने बानीको विकास हुनुका साथै राजस्व सङ्कलनमा समेत सकारात्मक प्रभाव परेको सरकारी बुझाइ छ । तर, उपभोक्तालाई बिल लिन प्रोत्साहित गरिए पनि केही व्यवसायीले बिल जारी गर्न आनाकानी गरेको गुनासो आएपछि विक्रेतालाई समेत पुरस्कार दिने तयारी गरिएको हो ।

अर्थमन्त्री वाग्लेले बिल लिनुपर्ने चेतना बढेसँगै बिल दिनुपर्ने संस्कार पनि विकास गर्न आवश्यक रहेको बताएका छन् । विक्रेतालाई प्रोत्साहन गर्दा बिल जारी गर्ने प्रक्रियालाई सहज बनाउनुपर्ने उनको भनाइ छ ।

हालको व्यवस्थाअनुसार बिल नम्बरका आधारमा प्रत्येक १५ दिनमा उपभोक्तामध्ये एक जनालाई एक लाख ३४ हजार रुपैयाँ र बम्पर विजेतालाई १० लाख रुपैयाँ पुरस्कार घोषणा गरिन्छ । आकस्मिक लाभकर कट्टीपछि दैनिक पुरस्कार विजेताले एक लाख रुपैयाँ र बम्पर विजेताले सात लाख ५० हजार रुपैयाँ प्राप्त गर्छन् ।

साउन १ देखि असोज १५ गतेसम्म पाँच चरणमा पुरस्कार घोषणा भइसकेको छ । यस अवधिमा ७४ जनाले जनही एक लाख रुपैयाँ र पाँच जनाले बम्पर पुरस्कारबापत जनही सात लाख ५० हजार रुपैयाँ प्राप्त गरिसकेका छन् ।

विभागले समयमै कार्यविधि संशोधन गरेमा असोज १६ देखि मसान्तसम्मको दोस्रो पाक्षिक पुरस्कार घोषणामा विक्रेतालाई समेत समेट्न सकिनेछ । यद्यपि, विक्रेताका लागि छुट्याइने पुरस्कार रकम कति हुने भन्ने टुङ्गो लागिसकेको छैन । उपभोक्तालाई दिइने पुरस्कारको तुलनामा विक्रेताको पुरस्कार रकम कम हुने बताइएको छ ।

कार्यक्रममा सहभागी हुन उपभोक्ताले सामान खरिद गर्दा सक्कल प्यान वा भ्याट बिल लिनुपर्छ । अनलाइन माध्यमबाट भुक्तानी गरी बिल लिने उपभोक्ता स्वतः पुरस्कारका लागि योग्य हुने व्यवस्था छ । नगदमा भुक्तानी गरी बिल लिएका उपभोक्ताले भने आन्तरिक राजस्व विभागको करदाता पुरस्कार पोर्टलमा उपलब्ध लिंकमार्फत बिल अपलोड गरेर सहभागिता जनाउन सक्छन् ।