रसुवा बाढी: बैंक तथा वित्तीय संस्थाका २७ कर्मचारी अझै सम्पर्कविहीन

काठमाडौं । रसुवामा आएको भीषण बाढीपछि जिल्लाका विभिन्न स्थानमा कार्यरत बैंक तथा वित्तीय संस्थाका कर्मचारी तथा सुरक्षा गार्ड गरी २७ जना अझै सम्पर्कविहीन रहेका छन् ।

नेपाल बैंकर्स संघका प्रमुख कार्यकारी अधिकृत अनिल शर्माका अनुसार स्याफ्रुबेसी, मैलुङ, वेत्रावतीलगायत क्षेत्रमा रहेका विभिन्न बैंकका कर्मचारीहरूसँग सम्पर्क स्थापित हुन सकेको छैन । बुधबार साँझसम्म २६ जना कर्मचारी सम्पर्कविहीन रहेकामा केही कर्मचारी सम्पर्कमा आए पनि सुरक्षा गार्डसमेत प्रभावित भएपछि हाल २७ जना सम्पर्कबाहिर रहेका हुन् ।

सम्पर्कविहीन कर्मचारी तथा सुरक्षाकर्मीको अवस्था पत्ता लगाउन नेपाल बैंकर्स संघले सम्बन्धित निकायसँग निरन्तर समन्वय गरिरहेको संघका अध्यक्ष सन्तोष कोइरालाले बताएका छन् ।

सम्बन्धित बैंकहरूले उपलब्ध गराएको विवरणअनुसार नेपाल इन्भेष्टमेन्ट मेगा बैंकका ७, माछापुच्छ्रे बैंकका ५, एनएमबी बैंकका ४, प्रभु बैंकका ४, लक्ष्मी सनराइज बैंकका ४, सानिमा बैंकका २ र हिमालयन बैंकका १ जना सम्पर्कविहीन छन् ।

बाढीको प्रभाव बैंकका कर्मचारीमा मात्र सीमित छैन । रसुवामा आएको बाढीले बैंक तथा वित्तीय संस्थाका करिब एक दर्जन शाखामा समेत ठूलो क्षति पुर्‍याएको छ। तीमध्ये नौ वाणिज्य बैंकका नौवटा शाखा पूर्ण रूपमा क्षतिग्रस्त भएको बताइएको छ ।