रसुवा बाढी: एनआईसी एशिया बैंकको २ करोड २१ लाख सहयोग

काठमाडौं । रसुवा जिल्लाको भोटेकोशी नदीमा आएको विनाशकारी बाढीबाट प्रभावित भएकाहरूका लागि एनआईसी एशिया बैंकले ‘प्रधानमन्त्री दैवी प्रकोप राहत उद्धार कोष’ मा २ करोड २१ लाख रुपैयाँ सहयोग प्रदान गरेको छ ।

बैंकले आफ्नो संस्थागत सामाजिक उत्तरदायित्व अन्तर्गत २ करोड रुपैयाँ र बैंकका सञ्चालक तथा कर्मचारीहरूको तर्फबाट संकलित २१ लाख रुपैयाँ गरी कुल २ करोड २१ लाख रुपैयाँको नगद सहयोग गरेको हो । बिहीबार बैंकका अध्यक्ष अशोक कुमार अग्रवाल र प्रमुख कार्यकारी अधिकृत सुजित कुमार शाक्यले संयुक्त रूपमा अर्थमन्त्री डा.स्वर्णिम वाग्लेलाई उक्त रकम बराबरको चेक हस्तान्तरण गरे ।

गत भदौ १० गते भोटेकोशी नदीमा अचानक आएको भीषण र अकल्पनीय बाढीका कारण रसुवा, नुवाकोट, धादिङ लगायतका क्षेत्रमा ठूलो मात्रामा भौतिक एवं मानवीय क्षति पुगेको छ । सोही विपद्को घडीमा राहत र उद्धार कार्यमा सहयोग पुर्‍याउने उद्देश्यले बैंकले यो आर्थिक सहायता उपलब्ध गराएको जनाएको छ ।