रसुवाको बाढीको असर नेप्सेमा, हाइड्रोपावर कम्पनीमा भारी गिरावट

काठमाडौं । रसुवामा आएको आकस्मिक बाढीबाट जलविद्युत् आयोजना तथा प्रसारण संरचनामा क्षति पुगेको समाचारसँगै नेपाल स्टक एक्सचेन्ज (नेप्से) मा रसुवा तथा आसपासका क्षेत्रमा आयोजना रहेका जलविद्युत् कम्पनीहरूको सेयर मूल्यमा तीव्र गिरावट आएको छ ।

नेपाल विद्युत् प्राधिकरणका अनुसार बाढीबाट रसुवागढी, चिलिमे, त्रिशूली–३ ए, त्रिशूली–३ बी हबअन्तर्गतको २२० केभी सबस्टेसन, त्रिशूली तथा देवीघाट जलविद्युत् केन्द्रलगायतका संरचनामा क्षति पुगेको छ ।

समाचार तयार पार्दासम्मको कारोबारमा रसुवागढी हाइड्रोपावर सबैभन्दा बढी घट्ने कम्पनी बनेको छ । कम्पनीको सेयर मूल्य १३.८४ प्रतिशतले घटेको छ ।

त्यस्तै, चिलिमे हाइड्रोपावरको सेयर मूल्य १०.३३ प्रतिशतले घटेर ४२६ रुपैयाँमा झरेको छ । रसुवामै अवस्थित २२.१ मेगावाट क्षमताको चिलिमे जलविद्युत् आयोजनामा बाढीबाट क्षति पुगेको समाचार सार्वजनिक भएपछि कम्पनीको सेयरमा बिक्री चाप बढेको देखिएको हो ।

यसैगरी त्रिशूली जलविद्युत्को सेयर मूल्य ९.५५ प्रतिशतले घटेर ४०५.२० रुपैयाँमा आएको छ । साञ्जेन जलविद्युत्को सेयर ९.४६ प्रतिशतले घटेर २३६.४० रुपैयाँ, माथिल्लो मैलुङ खोला जलविद्युत्को ७.७१ प्रतिशतले घटेर ३९१.३० रुपैयाँ तथा मैलुङ खोला जलविद्युत्को सेयर मूल्य ७.५८ प्रतिशतले घटेर ३८३ रुपैयाँमा झरेको छ । बाढीको प्रभावसँग सम्बन्धित अन्य जलविद्युत् कम्पनीहरूमा पनि उल्लेख्य गिरावट देखिएको छ । स्याप्रुबेँसी हाइड्रोपावरको सेयर मूल्य ९.४८ प्रतिशत, बराही हाइड्रोपावरको ५.८८ प्रतिशत तथा अन्य केही जलविद्युत् कम्पनीको सेयर मूल्य पनि घटेको छ ।

रसुवामा जलविद्युत् आयोजना तथा प्रसारण संरचनामा भएको क्षतिको समाचारले लगानीकर्तामा आयोजना सञ्चालन, उत्पादन तथा भविष्यको आम्दानीबारे चिन्ता बढाएको देखिन्छ । त्यसको प्रभावस्वरूप सम्बन्धित कम्पनीमा बिक्री चाप बढ्दा सेयर मूल्यमा तीव्र गिरावट आएको हुनसक्ने देखिन्छ ।

यद्यपि, बजारमा देखिएको गिरावटलाई पूर्णरूपमा बाढीको प्रभावकै परिणाम भनेर निष्कर्ष निकाल्न भने हतार हुनेछ । सम्बन्धित आयोजनामा भएको वास्तविक क्षति, पुनर्निर्माणमा लाग्ने समय तथा लागत, बीमा दाबी र कम्पनीको वित्तीय प्रभावबारे थप विवरण सार्वजनिक भएपछि मात्र बाढीले कम्पनीको आम्दानी र सेयर मूल्यमा पार्ने वास्तविक असर स्पष्ट हुनेछ ।