इरानलाई थप एक्ल्याउन अमेरिकाद्वारा ‘अपरेशन इकोनोमिक आउटकास्ट’ घोषणा, ६० भन्दा बढी निकायमाथि प्रतिवन्ध

एजेन्सी । अमेरिकाले इरानविरुद्ध आर्थिक डी-डेको चेतावनी दिँदै नयाँ र कठोर प्रतिवन्धहरूको घोषणा गरेको छ । अमेरिकी अर्थमन्त्री स्कट बेसेन्टले सोमवार एक प्रेस विज्ञप्ति जारी गर्दै इरानलाई अन्तर्राष्ट्रिय वित्तीय प्रणालीबाट पूर्ण रूपमा एक्ल्याउने उद्देश्यले ‘अपरेशन इकोनोमिक आउटकास्ट’ सुरु गरिएको जानकारी दिएका हुन् । राष्ट्रपति डोनाल्ड ट्रम्पको निर्देशनमा चालिएको यस कदमलाई इरानको वित्तीय सञ्जालविरुद्धको एक अभूतपूर्व अभियानका रूपमा हेरिएको छ ।

अर्थमन्त्री बेसेन्टकाअनुसार इरानको तर्फबाट मुद्रा निर्मलीकरण (मनी लाउण्डरिङ) मा सहयोग पुर्‍याउने जुनसुकै निकायलाई अमेरिकी डलर प्रणालीबाट निष्कासित गरिनेछ । 

यस पटकको प्रतिवन्धले विशेष गरी इरानका पाँचवटा मुख्य क्षेत्रहरूलाई लक्षित गरेको छ, डिजिटल सम्पती, प्रविधि, सुन, उड्डयन र ढुवानी (सिपिङ) यी क्षेत्रहरूलाई इरानले वैदेशिक व्यापार र स्रोत परिचालनका लागि मुख्य आधारका रूपमा प्रयोग गर्दै आएको अमेरिकी दाबी छ ।

नयाँ घोषणासँगै अमेरिकी अर्थ मन्त्रालयको विदेशी सम्पत्ति नियन्त्रण कार्यालयले ६० भन्दा बढी संस्थाहरू, व्यक्तिहरू र पानीजहाजहरूमाथि प्रतिबन्ध लगाएको छ । यी निकायहरू इरानको अवैध परमाणु र मिसाइल प्रविधि खरिद, साइबर अपरेशन तथा तेल राजश्व संकलनमा संलग्न रहेको बताइएको छ । 

यसैबीच, राष्ट्रपति ट्रम्पले विश्वका विभिन्न मुलुकका नेताहरूलाई टेलिफोन गर्दै इरानसँगको सम्बन्ध र सहकार्य अन्त्य गर्न आग्रह गरिरहेको समेत मन्त्रालयले जनाएको छ । नयाँ प्रतिवन्धहरूले इरानमाथि अन्तर्राष्ट्रिय आर्थिक दबाब थप बढ्ने निश्चित देखिएको छ ।