ओभरलोड र पानी चुहाउने ट्रकका कारण कलंकी-नागढुङ्गा सडक जोखिममा

काठमाडौं । क्षमताभन्दा बढी सामग्री बोकेका मालवाहक सवारीका कारण कलंकी-नागढुङ्गा सडकमा क्षति बढेको छ । सडक विभागकाअनुसार ओभरलोडका कारण सडकमा क्षति पुगेर आयु घट्दै गएको हो । सडकमा बालुवा लगायतका सामाग्री बोक्ने सवारीले पानी चुहाउने गरेका कारण दुर्घटनाको जोखिम समेत बढाएको काठमाडौं सडक डिभिजन कार्यलयका प्रमुख सुवोध देवकोटाले बताए । उनकाअनुसार कलंकीदेखि नागढुङ्गासम्मको सडकमा छ महिना अगाडि मात्रै ओभरले गरिएको हो ।

उनकाअनुसार सामान्य अवस्थामा सडक कम्तीमा पाँच वर्षमा ओभरले गर्नुपर्ने हुन्छ । तर ओभरलोडका कारण अहिले दुई वर्षमै सडक मर्मत गर्नुपर्ने अवस्था आएको उनको भनाई छ । सडकको अवस्था र ओभरलोडसम्बन्धी गुनासो आएपछि विभागले मंगलबार राती अनुगमन गरेको थियो । अनुगमनका क्रममा कतिपय ट्रकले सडकमा पानी चुहाउँदै हिँड्ने तथा तोकिएको क्षमताभन्दा बढी भार बोकेको भेटिएको उनले बताए । उनकाअनुसार मालबाहक सवारीको एउटा एक्सलको सडक क्षमता १० टन भएपनि अनुगमनका क्रममा सिंगल एक्सलका ट्रकले १२ देखि १३ टनसम्म र डबल एक्सलका ट्रकले २५ टनसम्म भार बोकेर हिँड्ने गरेको पाइएको छ ।

भार बढाउनुपर्ने अवस्थामा ट्रकको एक्सल क्षमता पनि सोहीअनुसार बढाए भएपनि मापदण्डविपरित भार बोक्ने प्रवृत्ति बढेको उनले बताए । कतिपय ट्रकमा यातायात व्यवस्था कार्यालयबाट स्वीकृत मापदण्डभन्दा ठूलो ढल्ला बनाइएको समेत भेटिएको उनले जानकारी दिए । सडकमा पानी चुहिँदा सतह चिप्लो हुने र त्यसका कारण मोटरसाइकल तथा अन्य सवारीको ब्रेक प्रभावकारी हुन नसक्ने दुर्घटनाको जोखिम पनि बढेको उनले बताए ।

ओभरलोड नियन्त्रणका लागि सडक विभागले जिल्ला प्रहरी कार्यालय, ट्राफिक प्रहरी कार्यालय र जिल्ला प्रशासन कार्यालयलाई पत्राचार गरी कारबाही प्रक्रिया अघि बढाउने विभागले जनाएको छ । सडक विभागसँग आफैं कारबाही गर्ने अधिकार नभएकाले सम्बन्धित निकायको समन्वयमा नियमन गर्नुपर्ने देवकोटाको भनाइ छ । यातायात व्यवस्था कार्यालय, ट्राफिक प्रहरी, जिल्ला प्रशासन र प्रहरीले नियमित अनुगमन तथा नियमन गरेमा सडक क्षति र दुर्घटनाको जोखिम घटाउन सकिने उनले बताए ।