हिमालयन बैंकको वितरणयोग्य नाफा करिव १० अर्ब ऋणात्मक, इम्पेयरमेन्ट चार्ज घट्दा नाफामा उल्लेख्य बृद्धि

काठमाडौं । हिमालयन बैंकले गत आर्थिक वर्ष (२०८२/८३) मा १ अर्ब ४८ करोड ३ लाख ८५ हजार रुपैयाँ खुद नाफा कमाएको छ । गत आर्थिक वर्षको चौथो त्रैमाससम्मको अपरिष्कृत वित्तीय अवस्था सार्वजनिक गर्दै हिमालय बैंकले अघिल्लो वर्ष (२०८१/८२) को १२ करोड ९७ लाख ६० हजार रुपैयाँको तुलनामा १०४१.१६ प्रतिशतले खुद नाफा बृद्धि गरेको छ । बैंकको खुद नाफा बढ्नुमा इम्पेयरमेन्ट चार्जको मुख्य हिस्सा छ ।

अघिल्लो वर्ष बैंकको इम्पेयरमेन्ट चार्ज ३ अर्ब ७५ करोड ६० लाख रुपैयाँ रहेकोमा गत वर्ष भने घटाएर २ अर्ब ८९ करोड ६४ लाख रुपैयाँमा सीमित गरेको छ । बैंकको यसअवधिमा खुद ब्याज आम्दानी १५.७४ प्रतिशतले घटेर ८ अर्ब ८१ करोड १ लाख ६२ हजार रुपैयाँमा खुम्चिएको छ ।

कुल सञ्चालन आम्दानी ११.०३ प्रतिशतले घटेर ११ अर्ब १६ करोडमा खुम्चिँदा बैंकको सञ्चालन नाफा पनि २३.६० प्रतिशतले घटेर २ अर्ब ६२ करोड ६० लाखमा सीमित भएको छ ।

बैंकको वितरणयोग्य नाफा भने अझै ठूलो मात्रामा ऋणात्मक छ । २०८३ असारसम्म बैंकको वितरणयोग्य नाफा ९ अर्ब ८४ करोड १ लाख रुपैयाँ ऋणात्मक छ । अघिल्लो वर्ष यस्तो नाफा ८ अर्ब ८५ करोड ४२ लाख रुपैयाँ ऋणात्मक थियो । बैंकको प्रतिसेयर आम्दानी ६.५६ रुपैयाँ रहँदा प्रतिसेयर नेटवर्थ १७७.४८ रुपैयाँ र खराब कर्जा (एनपीएल) ७.९७ प्रतिशत छ ।

चुक्ता पुँजी २२ अर्ब ५८ करोड १६ लाख रुपैयाँ रहेको छ हिमालयनको जगेडा कोषमा २६ अर्ब ८० करोड ९१ लाख रुपैयाँ छ । बैंकले २०८३ असारसम्म ३ खर्ब ५१ अर्ब ५७ करोड ७० लाख रुपैयाँ निक्षेप संकलन गरि २ खर्ब २७ अर्ब ७७ करोड ७९ लाख रुपैयाँ ऋण लगानी गरेको छ ।