मुग्लिन-नारायणगढखण्ड रातिका लागि बन्द, देशभरका कुन कुन सडकमा छ समस्या

काठमाडौं । निरन्तर सुक्खा पहिरो खस्ने क्रम नरोकिएपछि मुग्लिन-नारायणगढ सडकखण्डमा राति गाडी चलाउन रोक लगाइएको छ ।

जिल्ला प्रशासन कार्यालय चितवनले मंगलबार राति ८ बजेदेखि बुधबार बिहान ५ बजेसम्मका लागि नारायणगढ-मुग्लिन सडकमा सबै प्रकृतिका सवारीसाधनहरू सञ्चालनमा रोक लगाएको हो ।

मुग्लिन-नारायणगढ सडक खण्ड अन्तर्गत मुग्लिन बजार नजिकै नारायणगढ तर्फ सुक्खा पहिरो गई सडक अवरुद्ध भएको र सुक्खा पहिरो खस्ने क्रम निरन्तर चलिरहेकाले रातिको समयमा सवारी साधन चल्न दिँदा हुन सक्ने मानवीय जोखिमलाई ध्यान दिएर राति सवारी आवगमन बन्द गरिएको प्रशासनले जारी गरेको सूचनामा उल्लेख छ ।

नेपाल प्रहरी केन्द्रीय कार्यालयले नारायणगढ-मुग्लिन सडकसहित देशभरका विभन्न ८ स्थानमा बाटो अवरुद्ध भएको जनाएको छ । प्रहरी साँझ १८ः२० बजे जारी सूचनाअनुसार अरनिको, मेची, विपी राजमार्गलयात धेरै स्थानका बाटोमा समस्या रहेको जनाएको छ । 

यस्तो प्रहरीले बाटो अवरुद्ध सम्वन्धि जारी गरेको सूचना :- मिति २०८३।०४।१२ गते १८:२० बजे सम्म ।

१.जिल्ला चितवन मुग्लिङ नारायणगढ सडक खण्ड रातिको समयमा बन्द हुने

मिति २०८३।०४।१२ गते २०:०० बजे बाट २०८३।०४।१३ गते बिहान ०५:०० बजे सम्म राजमार्ग बन्द हुने 

नारायणगढ मुग्लिङ सडक खण्ड अन्तर्गत सुख्खा पहिरो खस्ने क्रम निरन्तर भइरहेको ले सम्पुर्ण सावारी साधनहरु लाई आवतजावतमा रोक लगाइएको ।

२. जि. काभ्रेपलाञ्चोक / सिन्धुली खुर्कोट-नेपालथोक-कटुन्जेबेँसी चल्ने सम्पूर्ण सवारी साधनहरू (वि.पि. राजमार्ग) सञ्चालनमा पूर्ण रूपमा रोक लगाइएको ।

जि. काभ्रे / खुर्कोट-नेपालथोक-कटुन्जेबेँसी-सिन्धुली चल्ने वि.पि. राजमार्ग सडक खण्डमा आइपर्ने सम्भावित बाढीलाई मध्यनजर गर्दै मिति २०८२।०२।२२ गते बेलुका १८:०० बजेदेखि बिहान ०४:०० बजेसम्म चल्ने सम्पूर्ण सवारी साधन अर्को सूचना नभएसम्मका लागि आवतजावतमा रोक लगाइएको । बिहान ०४:०० बजे देखि बेलुका १८:०० बजे सम्म सम्पूर्ण सवारी साधनहरु सुचारु हुने ।

३.जि.मकवानपुर कान्ति लोकपथ बर्षातको कारण सबै किसिमका सवारी साधनहरुलाई रातिको समयमा रोक लगाईएको ।

मिति २०८२।०३।१८ गते बेलुका १७:०० बजेदेखि बिहान ०५:०० बजेसम्म चल्ने सम्पूर्ण सवारी साधन अर्को सूचना नभएसम्मका लागि आवतजावतमा रोक लगाइएको । 

४. जि. इलाम मेची राजमार्ग पूर्ण रुपमा अवरुद्ध ।

मिति २०८३।०३।२३ गते १०:०० बजेको समयमा जिल्ला इलाम, इलाम न.पा.-९, राजदुवाली स्थित मेची राजमार्गमा वर्षाको कारण बाटो हिलो भई सवारी साधन आवतजावत गर्न नसक्ने भएकोले उक्त सडक खण्ड पूर्ण रूपमा अवरुद्ध भएको (उक्त स्थानमा वैकल्पिक बाटो रहेको) ।

५. जि. सिन्धुपाल्चोक अरनिको राजमार्ग पूर्ण रूपमा अवरुद्ध ।

(क) मिति २०८३।०३।३१ गते ०८:३० बजे भोटेकोशी गा.पा.-४, जिरोकिलो अरनिको राजमार्गमा  सडक माथिबाट पहिरो खसी  बाटो पूर्ण रूपमा अवरुद्ध भएको ।

(ख) मिति २०८३।०४।०१ गते ११:०० बजेको समयमा जिल्ला सिन्धुपाल्चोक भोटेकोशी गा.पा. २ कोदारी स्थित अरनिको राजमार्गमा ईकु पहिरोमा सडक माथिबाट ढुङ्गा माटो सहित लेदो खसि पूर्ण रूपमा अवरुद्ध भएको ।

६. जि.दोलखा लामासाघु-रामेछाप राजमार्ग पुर्ण रुपमा पूर्ण रूपमा अवरुद्ध ।

मिति २०८३।०४। ०७ अं. ००;१० बजेको समयमा अबिरल बर्षाको कारण जि. दोलखा तामाकोशी गा.पा. ५ किर्नेटार स्थित लामासाघु-रामेछाप राजमार्ग सडक खण्डमा सामाकोशी खोलाको पानीको बहाव बढी कटान गरि सडक खण्ड पुर्ण रुपमा अवरोध भएको । (ऐ.१०:३० बजे खिम्ती ग्रामिण बिधुत सहकारी संस्थाको कार्यालयको परिषरबाट बैकल्पिक बाटो खुलाइएको ।)

७. जि. रसुवा पासाङ ल्हामु सडक खण्ड पुर्ण रुपमा पूर्ण रूपमा अवरुद्ध ।

मिति २०८३।०४।०८ गते अं. ०८:०० बजेको समयमा जिल्ला रसुवा उत्तरगया गा.पा. वडा नं. ५ खाल्टे स्थित त्रिशुली मैलुङ स्याफ्रुबेशी जाने कच्ची सडक खण्डमा त्रिशुली नदीले सडक मुनीबाट कटान गरी पूर्ण रुपमा अवरुद्ध भएको ।

८.जि. ललितपुर  कान्तिलोकपथ सडक खण्ड पूर्ण रूपमा अवरुद्ध ।

मिति २०८३।०४।१२ गते ०५:३५ बजेको समयमा जिल्ला ललितपुर बागमती गा.पा. ०३ पाङदुर स्थित माथीबाट सुख्खा पहिरो गई कान्तिलोकपथ सडक खण्ड पुर्ण रुपमा अवरुद्ध भएको ।