बिल लिने संस्कृतिको विकास गर्न चिठ्ठाः दैनिक १ लाख ३३ हजार र १५ दिनमा १० लाख जित्ने अवसर (कार्यविधिसहित)

काठमाडौं । सरकारले मूल्य अभिवृद्धि कर (भ्याट) प्रणालीलाई प्रभावकारी बनाउन तथा उपभोक्तालाई सक्कली बिल लिन प्रोत्साहन गर्न ‘लखपति योजना’ अघि सारेको छ ।

योजना अनुसार हरेक दिन एक जना नेपाली लखपति बन्नेछन् भने प्रत्येक महिनामा दुई जनाले बम्पर पुरस्कारस्वरूप जनही १० लाख रुपैयाँ प्राप्त गर्नेछन् ।

लखपति योजनामा भ्याट तथा स्थायी लेखा नम्बर (प्यान) प्रणालीमा आबद्ध व्यवसायबाट कम्तीमा १०० रुपैयाँभन्दा बढीको सामान वा सेवा खरिद गरी सक्कली बिल लिएका उपभोक्ता सहभागी हुन पाउँछन् । नगद वा अनलाइन माध्यमबाट गरिएको भुक्तानीको आधिकारिक बिलमा उल्लेख भएको बिल नम्बर नै पुरस्कार छनोटको आधार बन्ने छ ।

यो योजनाका विजेता घोषणा प्रत्येक महिनाको १६ गते र महिनाको अन्तिम दिन गरी पाक्षिक रूपमा गिरिने छ । चालु आर्थिक वर्षको बजेटमार्फत घोषणा गरिएको कार्यक्रम कार्यान्वयन गनै लखपति योजना अघि सारिएको हो । त्यसका लागि सरकारले आवश्यक कार्यविधिसमेत तयार गरेको छ। करदाता प्रोत्साहन उपहार कार्यक्रम सञ्चालन कार्यविधि २०८३ सार्वजनिक गरि अर्थ मन्त्रालयले कस्ता बिल लिनेले कसरी पुरस्कार कार्यक्रममा सहभागि हुने भन्ने जानकारी दिएको छ ।

सरकारले उपभोक्तालाई हरेक खरिदमा सक्कली बिल लिन आग्रह गर्दै आएको छ । विशेषगरी होटल, रेस्टुरेन्ट तथा अन्य व्यवसायिक प्रतिष्ठानबाट सामान वा सेवा खरिद गर्दा सक्कली बिल लिएर सुरक्षित राख्न अर्थ मन्त्रालयले आह्वान गरेको छ । यस कार्यक्रम कार्यान्वयनबाट करको दायरा विस्तार हुनुका साथै कर छलि नियन्त्रण, कारोबारको पारदर्शिता वृद्धि र उपभोक्तामा सक्कली बिल लिने बानीको विकास हुने अपेक्षा अर्थ मन्त्रालयले गरेको छ ।