सरकारी कर्मचारीलाई नयाँ आचारसंहिता: कार्यालय समयमा फोटो–भिडियो पोस्ट गर्न रोक, सरकारविरुद्ध सामाजिक सञ्जालमा टिप्पणी गर्न नपाइने

काठमाडौं । सरकारले सरकारी कर्मचारीका लागि नयाँ ‘कर्मचारीले पालना गर्नुपर्ने आचारसंहिता, २०८३’ लागू गर्दै सामाजिक सञ्जालको प्रयोगदेखि सेवाग्राहीसँगको व्यवहारसम्म कडा मापदण्ड तय गरेको छ । भूमि व्यवस्था, सहकारी, संघीय मामिला तथा सामान्य प्रशासन मन्त्रालयले मन्त्री प्रतिभा रावलको असार १६ गतेको निर्णयअनुसार स्वीकृत आचारसंहिता असार २२ गतेदेखि कार्यान्वयनमा ल्याएको हो ।

नयाँ व्यवस्थाअनुसार कर्मचारीले कार्यालय समय, कार्यालय परिसर वा फिल्डमा सरकारी पोसाकमा खिचिएका फोटो तथा भिडियो फेसबुक, टिकटक, एक्स (ट्विटर), ह्वाट्सएपलगायत सामाजिक सञ्जालमा पोस्ट गर्न पाउने छैनन् । शिक्षामूलक वा सूचनामूलक सामग्री भने यसबाट अपवाद रहनेछ। त्यस्तै, सरकारको नीति तथा कार्यक्रमविपरीत लेख प्रकाशित गर्न वा सामाजिक सञ्जालमा टिप्पणी गर्नसमेत रोक लगाइएको छ । मन्त्रालयले सामाजिक सञ्जाल प्रयोग गर्दा सेवाको मर्यादा र सार्वजनिक विश्वासमा आँच नआउने गरी व्यावसायिक सतर्कता अपनाउन कर्मचारीलाई निर्देशन दिएको छ ।

आचारसंहिताले सेवाग्राहीसँग शिष्ट, मर्यादित र समान व्यवहार गर्नुपर्ने, कुनै पनि प्रकारको पक्षपात, पूर्वाग्रह वा भेदभाव गर्न नपाइने स्पष्ट पारेको छ । साथै, कार्यस्थल बाहिर सेवाग्राहीसँग व्यक्तिगत भेटघाट गर्न, सेवाग्राहीको प्रतिनिधि वा एजेन्टका रूपमा काम गर्न तथा पदको दुरुपयोग गरी व्यक्तिगत वा पारिवारिक लाभ लिन पनि रोक लगाइएको छ । 

कर्मचारीले कार्यालय समयको पूर्ण पालना गर्नुपर्ने, तोकिएको पोसाक र परिचयपत्र अनिवार्य रूपमा लगाउनुपर्ने तथा कार्यालय वा सार्वजनिक स्थलमा मदिरा सेवन, धूम्रपान, जुवातास खेल्ने जस्ता अमर्यादित गतिविधि गर्न नपाइने व्यवस्था गरिएको छ । त्यस्तै, सरकारी छाप, प्रतीक चिन्ह, इमेल, पासवर्ड, कागजात, सूचना प्रणाली र अन्य सरकारी सम्पत्तिको दुरुपयोग गर्न वा व्यक्तिगत प्रयोजनमा प्रयोग गर्न पनि निषेध गरिएको छ ।

मन्त्रालयले आचारसंहिता कार्यान्वयनको नियमित अनुगमन सचिव वा तोकिएको अधिकारीमार्फत गरिने जनाएको छ । आचारसंहिता उल्लंघन गर्ने कर्मचारीमाथि प्रचलित कानुनअनुसार कारबाही गरिने चेतावनीसमेत मन्त्रालयले दिएको छ ।