अधिक तरलता व्यवस्थापन गर्न राष्ट्र बैंकले ६३ दिनका लागि २० अर्ब निक्षेप संकलन गर्दै

काठमाडौं । नेपाल राष्ट्र बैंकले बैंक तथा वित्तीय प्रणालीमा देखिएको अधिक तरलता व्यवस्थापन गर्न ६३ दिन अवधिको निक्षेप संकलन उपकरण प्रयोग गर्दै २० अर्ब रुपैयाँ उठाउने भएको छ । केन्द्रीय बैंकले बुधबार बोलकबोल प्रक्रियामार्फत उक्त रकम संकलन गर्न लागेको हो । 

इच्छुक बैंक तथा वित्तीय संस्थाहरुले आज दिउसो ३ बजेसम्म अनलाइन आवेदन दिन सक्नेछन् । 

निक्षेप संकलनमा सहभागी हुन इच्छुक बैंक तथा वित्तीय संस्थाले न्यूनतम १० करोड रुपैयाँ र अधिकतम ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोल गर्न सक्नेछन्। बहुब्याजदरमा समेत बहुबोलकबोल गर्न सकिने व्यवस्था गरिएको राष्ट्र बैंकले जनाएको छ ।

रकम बाँडफाँट गर्दा सबैभन्दा कम ब्याजदर बोल गर्ने संस्थालाई पहिलो प्राथमिकता दिइनेछ। त्यसपछि क्रमशः बढी ब्याजदरका बोलहरू स्वीकार गर्दै आह्वान गरिएको रकम पूरा गरिनेछ । यस निक्षेप संकलनमा नेपाल राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् ।