भारतसँग आर्थिक साझेदारी नयाँ उचाइमा पुर्‍याउनुपर्नेमा अर्थमन्त्री वाग्लेको जोड

काठमाडौं । अर्थमन्त्री डा. स्वर्णिम वाग्लेले नेपाल र भारतबीचको आर्थिक तथा रणनीतिक साझेदारीलाई नयाँ उचाइमा पुर्‍याउन भौतिक, डिजिटल तथा ऊर्जा सञ्जाल विस्तार गर्नुपर्नेमा जोड दिएका छन् ।

भारतको औपचारिक भ्रमणमा रहेका अर्थमन्त्री वाग्लेले शुक्रबार नयाँ दिल्लीस्थित इन्डिया इन्टरनेसनल सेन्टरमा आयोजित उच्चस्तरीय कूटनीतिक गोलमेच संवादलाई सम्बोधन गर्दै दुई देशबीचको साझेदारीलाई समयसापेक्ष बनाउन आवश्यक रहेको बताए ।

नेपालमा हालै भएको प्राकृतिक विपद्का क्रममा भारत सरकार तथा जनताले गरेको सहयोगप्रति आभार व्यक्त गर्दै उनले विपद्पछिको पुनर्निर्माणलाई दिगो र सुरक्षित बनाउन ‘बिल्ड ब्याक बेटर’ अवधारणाअनुसार अघि बढिरहेको बताए । जलवायु परिवर्तनको असर नेपालले बढी भोगिरहेको उल्लेख गर्दै उनले जलवायु न्यायको मुद्दा नेपाल र भारतले अन्तर्राष्ट्रिय मञ्चमा संयुक्त रूपमा उठाउनुपर्ने धारणा राखे ।

अर्थमन्त्री वाग्लेले परम्परागत सहायता प्रणालीभन्दा माथि उठेर हरित वित्त, सहुलियतपूर्ण वित्तीय उपकरण तथा विकास वित्तका नयाँ आयाम परिचालन गर्नुपर्ने बताए ।

नेपाल–भारत व्यापार सन्धिमा समयानुकूल सुधार गरी व्यापार घाटा घटाउन र गैरभन्सार अवरोध हटाउनुपर्नेमा पनि उनले जोड दिए । नेपालमा लगानीको वातावरण सुधारका लागि नीतिगत तथा कानुनी सुधार भइरहेकाले ऊर्जा, उत्पादनमूलक उद्योग र प्रविधि क्षेत्रमा भारतीय लगानी बढाउन उनले आग्रह गरे ।

वर्तमान सरकार सुशासन, संस्थागत सुधार र नीतिगत स्थायित्वमार्फत आर्थिक रूपान्तरणमा केन्द्रित रहेको बताउँदै वाग्लेले पारदर्शी र जवाफदेही शासन आर्थिक समृद्धिको आधार भएको उल्लेख गरे ।

कार्यक्रममा भारतीय राजनीतिज्ञ, कूटनीतिज्ञ, अर्थशास्त्री तथा रणनीतिक मामिलाका विज्ञहरूको सहभागिता थियो। छलफलमा नेपाल–भारत सम्बन्धलाई थप परिणाममुखी बनाउन सीमापार कनेक्टिभिटी, ऊर्जा साझेदारी र पारस्परिक विश्वासलाई प्राथमिकता दिनुपर्नेमा जोड दिइएको थियो ।