रास्वपा केन्द्रीय समिति बैठक सुरु, उम्मेदवार छनोटदेखि संगठन विस्तारसम्मका विषयमा छलफल हुने

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक वनस्थलीस्थित घण्टी घर केन्द्रीय कार्यालयमा सुरु भएको छ । वनस्थलीस्थित घण्टी घर केन्द्रीय कार्यालयमा बैठक सुरु भएको हो ।

महामन्त्री विपिनकुमार आचार्यका अनुसार बैठकमा पार्टीका विभिन्न दस्तावेज, संगठन व्यवस्थापन, पदाधिकारी तथा सदस्य मनोनयन, आगामी योजना र अभियानका विषयमा छलफल भइरहेको छ ।

बैठकमा आगामी स्थानीय निर्वाचनका लागि उम्मेदवार छनोटसम्बन्धी ‘रूपरेखा २०८३’ अनुमोदन गर्ने तथा ‘राइट टु रिकल’ सम्बन्धी दस्तावेज तयार गर्ने विषयलाई पनि एजेन्डामा राखिएको छ ।

त्यस्तै, केन्द्रीय समिति सदस्य, पदाधिकारी, सचिवालय सदस्य तथा विभागीय प्रमुखहरूको मनोनयनबारे छलफल हुने बताइएको छ । स्थानीय निर्वाचनका लागि केन्द्रीय उम्मेदवार छनोट समितिका सदस्य चयन गर्ने विषय पनि बैठकको कार्यसूचीमा छ ।

यसैगरी, स्थानीय तहमा उम्मेदवार छनोटसम्बन्धी अभिमुखीकरण तथा प्रशिक्षण कार्यक्रम सञ्चालन गर्ने र पार्टीको मुखपत्रका रूपमा ‘स्वतन्त्र’ नामक मासिक डिजिटल पत्रिका प्रकाशन गर्ने विषयमा समेत बैठकमा छलफल हुने महामन्त्री आचार्यले जानकारी दिएका छन् ।