वित्तीय क्षेत्रमा अधिक तरलताको चाप, एक सातामै एक वर्ष अवधिको ७५ अर्ब ऋणपत्र बिक्री

काठमाडौं । नेपाल राष्ट्र बैंकले तेस्रो पटक २५ अर्ब रुपैयाँको ऋणपत्र जारी गरेको छ । केन्द्रीय बैंकले ‘नेपाल राष्ट्र बैंक ऋणपत्र २०८३ ’ग’ निष्कासन गरेको हो ।

राष्ट्र बैंकले १ वर्ष अवधिको २५ अर्ब रुपैयाँको ऋणपत्र निष्कासन गरेको जनाएको छ । ऋणपत्रको ब्याज अर्धवार्षिक रुपमा भुक्तानी हुनेछ । ऋणपत्रको ब्याजदर बोलकबोल माध्यमबाट तय गरिने जनाइएको छ । ऋणपत्रमा न्युनतम ५ करोड र बढीमा ५ करोडले भाग गर्दा निःशेष भाग जानेगरी कुल आह्वान रकमसम्म आवेदन दिन सकिने छ ।

यसको सावाँ २०८३ पुस २० गते भुक्तानी हुनेछ । ऋणपत्रमा वाणिज्य बैंक, विकास बैंक र फाइनान्स कम्पनीले मात्रै आवेदन दिने सक्नेछन् । ऋणपत्रमा लगानी गर्ने बैंक तथा वित्तीय संस्थाले त्यसलाई राष्ट्र बैंक र अन्य बैंक तथा वित्तीय संस्थामा धितोको रुपमा प्रयोग गर्न सक्नेछन् ।

वित्तीय क्षेत्रमा बढ्दो तरलता व्यवस्थापन गर्न केन्द्रिय बैंकले विगतमा छोटो अवधिको ऋणपत्र निस्काशन गर्दै तरलता खिचिरहेकोमा पछिल्लो समय एक वर्ष अवधिको ऋणपत्र धमाधम विक्री गरिरहेको छ । यसअघि २०८३ पुस १४ गते र २०८३ पुस १६ गते सावाँ भुक्तानी गर्ने गरि २५/२५ अर्ब रुपैयाँको ऋणपत्र निस्काशन गरिएको थियो ।