सालपा विकास बैंकको आईपीओमा आवेदन दिने आज अन्तिम दिन, कार्यालय समयपछि बन्द हुने

काठमाडौं । सालपा विकास बैंकले पुस १६ गतेदेखि निष्काशन तथा बिक्री खुला गरेको प्रारम्भिक सार्वजनिक प्रस्ताव (आइपीओ) मा आवेदन दिने आज (पुस २० गते) अन्तिम दिन हो । वैदेशिक रोजगारीमा गएकालाई बाँडफाँट गरेपछि बैंकले दोस्रो चरणमा सर्वसाधारणका लागि बुधबारदेखि आवेदन खुलाएको हो ।

बैंकले १४ करोड ३९ लाख १७ हजार ९०० रुपैयाँ बराबरको १४ लाख ३९ हजार १७९ कित्ता सेयर सर्वसाधारणका लागि छुट्याएको छ । बैंकले चुक्ता पुँजीको ३३ प्रतिशत अर्थात् १७ करोड २३ लाख ८८ हजार रुपैयाँको सेयर निष्कासन अनुमति पाएको थियो । बैंकको चुक्ता पुँजी हाल ५२ करोड २३ लाख रुपैयाँ छ । सर्वसाधारणले बैंकको सेयरमा अंकित मूल्य १०० रुपैयाँमा १० देखि अधिकतम् २५ हजार कित्ता सेयरका लागि आवेदन दिन सक्नेछन्।

गत असारसम्म बैंकको प्रति सेयर आम्दानी २.२४ रुपैयाँ छ । बैंकको प्रति सेयर नेटवर्थ १०५.१४ रुपैयाँ छ । जगेडा कोषमा २ करोड ७० लाख रुपैयाँ छ ।

आइपीओ निष्कासनका लागि गराएको रेटिङमा इन्फोमेरिक्स क्रेडिट रेटिङ नेपालले बैंकलाई आईआरएन सिंगल बी इस्यूअर रेटिङ दिएको छ । यसले बैकको समयमा वित्तीय दायित्व पूण गर्न सक्ने अवस्थामा उच्च जोखिम रहेको जनाउँछ । बैंकको सेयर निष्कासन तथा बिक्री प्रबन्धकमा मुक्तिनाथ क्यापिटल छ ।