हर्क साम्पाङले भने- भोटेकोशी पछि बुढीगण्डकी यो प्रकोप अब प्राकृतिक जस्तो लाग्न छोड्यो, यो षड्यण्त्र हुन सक्छ
.jpg)
उनले लगातारका बाढीका घटनालाई प्राकृतिक विपद्मा मात्रै सीमित गरेर हेर्न नहुने आशय व्यक्त गर्दै सम्भावित षड्यन्त्र र भूराजनीतिक अवस्थाबारे प्रश्न उठाएका हुन् ।
काठमाडौं । नेपालमा भोटेकोशीपछि बुढीगण्डकी नदीमा आएको विनाशकारी बाढीलाई लिएर श्रम संस्कृति पार्टीका अध्यक्ष हर्क साम्पाङले विभिन्न आशंका व्यक्त गरेका छन् । उनले लगातारका बाढीका घटनालाई प्राकृतिक विपद्मा मात्रै सीमित गरेर हेर्न नहुने आशय व्यक्त गर्दै सम्भावित षड्यन्त्र र भूराजनीतिक अवस्थाबारे प्रश्न उठाएका हुन् ।
सामाजिक सञ्जालमार्फत आफ्नो धारणा राख्दै साम्पाङले दुई नदीमा क्रमशः आएको बाढीको प्रसंग उल्लेख गरेका छन् । उनले यसका पछाडि प्राकृतिक कारणबाहेक अन्य पक्ष पनि हुन सक्ने सम्भावनातर्फ संकेत गरेका छन् । तर, बाढीलाई कुनै षड्यन्त्र वा भूराजनीतिक गतिविधिसँग जोड्ने दाबीको पुष्टि गर्ने प्रमाण सार्वजनिक भएको छैन ।
गोरखाको बुढीगण्डकी क्षेत्रमा आएको बाढीबारे प्रारम्भिक विवरणअनुसार चुमनुब्री क्षेत्रमा सुक्खा पहिरो खस्दा स्यार खोला थुनिएको र पछि थुनिएको पानी एक्कासि बगेको थियो । उक्त बाढीले विभिन्न बस्तीमा क्षति पुर्याउनुका साथै घर तथा पुलसमेत बगाएको बताइएको छ ।
साम्पाङले बाढीको कारणबारे आशंका व्यक्त गरे पनि घटनाको वास्तविक कारण यकिन गर्न सम्बन्धित निकायको आधिकारिक अनुसन्धान र भौगर्भिक अध्ययन आवश्यक देखिन्छ ।
सम्बन्धित खबर
