पाँच महिनापछि सेबोनबाट आईपीओ स्वीकृत, हिम पर्वत हाइड्रोलाई ५९ लाख कित्ता अनुमति

काठमाडौं । हिम पर्वत हाइड्रोपावर लिमिटेडले साधारण सेयर (आईपीओ) निष्कासनको अनुमति पाएको छ । नेपाल धितोपत्र बोर्ड (सेबोन) सञ्चालक समितिको शुक्रबार बसेको बैठकले कम्पनीलाई ५९ लाख १५ हजार कित्ता आईपीओ निष्कासनको अनुमति दिएको हो ।

अनुमति पाएसँगै हिम पर्वत हाइड्रोपावरले प्रतिकित्ता १०० रुपैयाँ अंकित मूल्यका ५९ करोड १५ लाख रुपैयाँ बराबरको आईपीओ निष्कासन गर्नेछ । कम्पनीको आईपीओ बिक्री प्रबन्धकमा सिटिजन्स क्यापिटल रहेको छ ।

सेबोनले गत वैशाख २ गतेयता कुनै पनि कम्पनीलाई आईपीओ निष्कासनको अनुमति दिएको थिएन । करिब पाँच महिनापछि हिम पर्वत हाइड्रोपावरले आईपीओ निष्कासनको अनुमति पाएसँगै प्राथमिक सेयर निष्कासनको प्रक्रिया पुनः अघि बढेको हो ।

सेबोन अध्यक्षमा डा. गोपाल भट्ट नियुक्त भएको करिब तीन महिनापछि पहिलोपटक आईपीओ स्वीकृति दिइएको हो । यससँगै लामो समयदेखि रोकिएको आईपीओ निष्कासन प्रक्रियाले गति लिने अपेक्षा गरिएको छ ।