पेट्रोलियमको मूल्य नबढाउने निर्णय, निगमलाई मासिक ३ अर्बभन्दा बढी घाटा

काठमाडौं । नेपाल आयल निगमले पेट्रोलियम पदार्थको खुद्रा बिक्री मूल्य यथावत् राख्ने निर्णय गरेको छ । अन्तर्राष्ट्रिय बजारमा पेट्रोलियम पदार्थको मूल्यमा भएको परिवर्तनअनुसार इन्डियन आयल कर्पोरेसन (आईओसी) बाट नयाँ खरिद मूल्य प्राप्त भए पनि चाडपर्व र बाढीबाट सिर्जित असहज परिस्थितिलाई मध्यनजर गर्दै निगमले हाललाई पुरानै मूल्य कायम राख्ने निर्णय गरेको हो ।

निगमले असोज १४ गते जारी गरेको प्रेस विज्ञप्तिअनुसार आईओसीबाट प्राप्त नयाँ खरिद मूल्यअनुसार पेट्रोलियम पदार्थको मूल्य समायोजन गर्दा उपभोक्तालाई थप आर्थिक भार पर्ने देखिएको छ । भोटेकोशीमा आएको असाधारण बाढी, चाडपर्वको समय तथा आम उपभोक्ताको हितलाई ध्यानमा राख्दै निगम सञ्चालक समितिले असोज १५ गतेदेखि लागू हुने गरी हालको खुद्रा बिक्री मूल्य यथावत् राख्ने निर्णय गरेको हो ।

निगमका अनुसार हाल काठमाडौं, पोखरा र दिपायल क्षेत्रमा पेट्रोलको मूल्य प्रतिलिटर २०० रुपैयाँ कायम गरिएको छ । त्यस्तै, डिजेल तथा मट्टितेलको मूल्य प्रतिलिटर २०० रुपैयाँ छ । पहिलो वर्गमा पर्ने क्षेत्रमा पेट्रोल, डिजेल तथा मट्टितेलको मूल्य प्रतिलिटर १९७ रुपैयाँ ५० पैसा र दोस्रो वर्गमा प्रतिलिटर १९९ रुपैयाँ कायम छ ।

त्यसैगरी, आन्तरिक हवाई इन्धनको मूल्य प्रतिलिटर २४८ रुपैयाँ र अन्तर्राष्ट्रिय हवाई इन्धनको मूल्य प्रतिकिलोलिटर १ हजार ६७ अमेरिकी डलर कायम गरिएको छ । एलपी ग्यासको मूल्य प्रतिसिलिन्डर २ हजार ५० रुपैयाँ यथावत् राखिएको निगमले जनाएको छ ।

निगमले मूल्य यथावत् राखे पनि हालको अवस्थामा मासिक रूपमा करिब ३ अर्ब २० करोड ३६ लाख रुपैयाँ घाटा हुने जनाएको छ । अन्तर्राष्ट्रिय बजारमा पेट्रोलियम पदार्थको मूल्यमा हुने उतारचढाव र खरिद मूल्यमा आएको परिवर्तनका कारण निगमको वित्तीय अवस्थामा दबाब परेको देखिन्छ ।

निगमले उपभोक्ताको हितलाई ध्यानमा राख्दै तत्कालका लागि मूल्य वृद्धि नगर्ने निर्णय गरेको भए पनि यसले निगममाथिको आर्थिक भार थप बढाउने देखिएको छ ।