इसेवाको सीईओमा निरज शर्मा

काठमाडौं । डिजिटल भुक्तानी सेवा प्रदायक इसेवा लिमिटेडको प्रमुख कार्यकारी अधिकृत (सीईओ) मा निरज शर्मा नियुक्त भएका छन् । इसेवा सञ्चालक समितिको भाद्र ३० गते बसेको बैठकले शर्मालाई असोज १२ गतेदेखि लागू हुने गरी चार वर्षका लागि सीईओ नियुक्त गर्ने निर्णय गरेको हो। उनले आजदेखि आफ्नो कार्यभार सम्हालेका छन् ।

बैंकिङ तथा वित्तीय क्षेत्रमा २५ वर्षभन्दा लामो अनुभव भएका शर्मा ट्रान्जेक्सन बैंकिङ, कार्ड प्रणाली, रिटेल बैंकिङ तथा डिजिटल रूपान्तरणका क्षेत्रमा अनुभवी मानिन्छन् । डिजिटल वित्तीय सेवा, नवप्रवर्तन, रणनीतिक विस्तार तथा ग्राहककेन्द्रित सेवा विकासमा शर्माको अनुभव रहेको कम्पनीले जनाएको छ । टोली नेतृत्व र संस्थागत रूपान्तरणमा समेत उनले काम गरिसकेका छन् ।

शर्माको नेतृत्वले इसेवाको डिजिटल वित्तीय सेवा विस्तार तथा आगामी रणनीतिक योजनालाई थप प्रभावकारी बनाउन सहयोग पुग्ने विश्वास सञ्चालक समितिले व्यक्त गरेको छ । बदलिँदो ग्राहक आवश्यकता र डिजिटल भुक्तानीको विस्तारसँगै कम्पनीलाई थप सुदृढ बनाउन उनको नेतृत्व महत्वपूर्ण हुने इसेवाको भनाइ छ ।