जनकपुरधाममा हरवा–चरवाको धर्ना एक सातादेखि जारी, पुनःस्थापनाका लागि सरकारको ध्यानाकर्षण

काठमाडौँ । हरवा-चरवा अधिकारको माग गर्दै जनकपुरधामस्थित मधेस भवन अगाडि सुरु गरिएको धर्ना कार्यक्रम एक सातादेखि निरन्तर जारी छ । 

हरवा-चरवा संघर्ष समिति मधेस प्रदेशको अगुवाइमा विभिन्न माग राख्दै सुरु गरिएको यस धर्नामा मधेसका आठै जिल्लाका प्रतिनिधिहरूको सहभागिता रहेको छ । संघर्ष समितिले हरवा-चरवा परिवारको लगत संकलन, प्रमाणीकरण र परिचयपत्र वितरणको प्रक्रिया तत्काल अघि बढाउन माग गरेको छ । लामो समयदेखि भूमिहीनता र श्रम शोषणको चपेटामा परेका हरवा-चरवा समुदायको पहिचान गरी उनीहरूको दिगो पुनस्र्थापनाका लागि स्पष्ट कार्ययोजना स्वीकृत र कार्यान्वयन गर्नुपर्ने उनीहरूको मुख्य माग रहेको छ । संघर्ष समितिका सदस्य लागेन्द्र सदाले सरकारले हरवा-चरवा समुदायको अधिकार र पुनस्र्थापनाका सन्दर्भमा विगतमा गरेका प्रतिबद्धताहरू कार्यान्वयन नगरेकाले आफूहरू सडकमा उत्रिनु परेको बताए । समितिले सरकारलाई आफ्ना मागहरूप्रति गम्भीर बन्न र विगतका सम्झौताहरू पालना गर्न ध्यानाकर्षण गराएको छ । माग सम्बोधन नभएसम्म धर्ना र दबाबका कार्यक्रमहरूलाई निरन्तरता दिने समितिले जनाएको छ ।