तिब्बतको पहिरोपछि आएको बाढीबाट ९० हजारभन्दा बढी प्रभावित-रेडक्रस

काठमाडौं । तिब्बतमा गएको पहिरोका कारण नेपालमा आएको बाढीबाट ९० हजारभन्दा बढी मानिस प्रभावित भएको अनुमान गरिएको छ । रेडक्रसले शुक्रबार उक्त जानकारी दिँदै प्रभावित क्षेत्रमा थप बाढी आउन सक्ने जोखिमप्रति चिन्ता व्यक्त गरेको छ ।

नेपालका लागि इन्टरनेशनल फेडरेसन अफ रेडक्रस एण्ड रेड क्रिसेन्ट सोसाइटीज (आईएफआरसी) का प्रतिनिधिमण्डल प्रमुख डेभिड फिसरले दोस्रो बाढी आउन सक्ने सम्भावनालाई लिएर आफूहरू गम्भीर रूपमा चिन्तित रहेको बताएका छन् ।

‘हामी पक्कै पनि दोस्रो बाढीको बारेमा धेरै चिन्तित छौं,’ फिसरले भने । उनका अनुसार पहिरोका कारण बनेको तालको बाँध फुटेपछि आएको बाढीले राहत सामग्री बोकेका रेडक्रसका ट्रकहरूको आवागमनसमेत अवरुद्ध भएको छ ।

बाढी प्रभावित क्षेत्रमा राहत तथा उद्धार कार्य जारी रहे पनि सम्भावित थप बाढीको जोखिमका कारण सहायता र उद्धार कार्य चुनौतीपूर्ण बनेको जनाइएको छ ।