एक वर्षमा वाणिज्य बैंकहरुले कमाए करिव ७० अर्ब रुपैयाँ, कुन बैंकको अवस्था कस्तो ?
हिमालयन र एनआईसी एसियाले नाफामा चमात्कारिक बृद्धि गर्दा प्रभू बैंक भने घाटामा
.jpg)
गत असारमा काठमाडौँ उपत्यका लगायतका शहरी क्षेत्रमा बढेको घरजग्गाको कारोबार, ब्याज अशुलीका लागि राष्ट्र बैंकले दिएको १५ दिनको अतिरिक्त समय र कतिपय अवस्थामा बैंकहरुले खराब ऋण उठाउन नयाँ ऋण दिने प्रयासका कारण बैंकहरुको समग्र चित्रमा सुखद देखिएको हो ।
काठमाडौं । गत आर्थिक वर्ष २०८२र८३ मा वाणिज्य बैंकहरूले कुल ६९ अर्ब ८६ करोड ६० लाख रुपैयाँ खुद नाफा कमाएका छन् । जुन नाफा अघिल्लो आर्थिक वर्ष २०८१र८२ को ५२ अर्ब ८१ करोड ७५ लाख रुपैयाँको तुलामा ३२.२७ प्रतिशत अर्थात् १७ अर्ब ४ करोड ८५ लाख रुपैयाँले बढी हो ।
सबै बैंकहरुले गत वर्षको अपरिस्कृत वित्तीय विवरण सार्वजनिक गरेसँगै उनीहरुको वित्तीय अवस्था सतहमा आएको हो । समग्रमा नाफा बढेपनि सबै बैंकको अवस्था एउटै छैन । गत असारमा काठमाडौँ उपत्यका लगायतका शहरी क्षेत्रमा बढेको घरजग्गाको कारोबार, ब्याज अशुलीका लागि राष्ट्र बैंकले दिएको १५ दिनको अतिरिक्त समय र कतिपय अवस्थामा बैंकहरुले खराब ऋण उठाउन नयाँ ऋण दिने प्रयासका कारण बैंकहरुको समग्र चित्रमा सुखद देखिएको हो । कुनै बैंकले राम्रो कमाई गरिरहँदा केही बैंकहरुको अवस्था भने खस्किएको छ । हाल मुलुकमा २० वाणिज्य बैंकहरू सञ्चालनमा छन् ।
नाफाको आकारमा नबिल बैंक सबैभन्दा अगाडी देखिएको छ । नबिलले गत वर्ष ७ अर्ब ९० करोड ५७ लाख ९६ हजार रुपैयाँ नाफा कमाएको छ । अघिल्लो वर्ष भने नबिलले ५ अर्ब ९२ करोड २१ लाख ४४ हजार रुपैयाँ नाफा कमाएको थियो । यसअवधिमा नबिलको नाफा साढे ३३ प्रतिशतले बढेको छ ।
यसपटक नबिललाई कुमारी बैंकले पछ्याएको छ । यसपटक कुमारी बैंक सबैभन्दा धेरै नाफा बढाउने बैंकहरुमध्ये दोस्रोमा परेको छ । कुमारीको नाफा अघिल्लो वर्षको १ अर्ब ८१ करोड ९६ लाख ९८ हजार रुपैयाँको तुलनामा ३०५.९६ प्रतिशतले बढाएर गत वर्ष ७ अर्ब ३८ करोड ७१ लाख ९७ हजार रुपैयाँ पुर्याएको छ ।
बढी नाफा कमाउने बैंकको सूचीमा ग्लोबल आइएमई बैंक छ । ग्लोबल आईएमईले अघिल्लो वर्षको ५ अर्ब ७ करोड ६३ लाख ४ हजार रुपैयाँमा २२.६७ प्रतिशतले नाफा बढाउँदै ६ अर्ब २२ करोड ७१ लाख ५६ हजार रुपैयाँ पुर्याएको छ ।
उता, चौथो सूचीमा रहेको एभरेस्ट बैंकले गत वर्ष ५ अर्ब ६ करोड ९९ लाख ३६ हजार रुपैयाँ नाफा कमाएको छ । जुन अघिल्लो वर्षको नाफा ४ अर्ब ८३ करोड ९९ लाख ३ हजार रुपैयाँको तुलनााम ४.७५ प्रतिशत मात्र बढी हो ।
बढी नाफा गर्नेमा एभरेस्टलाई सरकारी स्वामित्वको राष्ट्रिय वाणिज्य बैंकले पछ्याएको छ । गत वर्ष राष्ट्रिय वाणिज्य बैंकले ४ अर्ब ५५ करोड ६८ लाख ९१ हजार रुपैयाँ नाफा कमाएको छ । जुन अघिल्लो वर्षको नाफा २ अर्ब ८३ करोड ६० लाख २ हजार रुपैयाँको तुलनामा ६०.६८ प्रतिशतले बढी हो ।
राष्ट्रिय वाणिज्य बैंकलाई भने नेपाल बैंकले पछ्याएको छ । नेपाल बैंकले गत वर्ष ४ अर्ब ५० करोड रुपैयाँ खुद नाफा गरेको छ । जुन अघिल्लो आर्थिक वर्षको ३ अर्ब ७ करोड रुपैयाँको तुलनामा ४६.२० प्रतिशतले धेरै हो ।
नेपाल बैंकलाई प्राईम कमर्सियल बैंकले पछ्याएको छ । प्राईमले गत वर्ष ४ अर्ब ११ करोड २५ लाख ६८ हजार रुपैयाँ नाफा कमाएको छ । जुन नाफा अघिल्लो वर्षको ३ अर्ब २० करोड ७ लाख ५८ हजार रुपैयाँको तुलनामा २८.४९ प्रतिशतले बढी हो ।
प्राईमलाई पछ्याएको एनएमबी बैंकले आफ्नो नाफा गत वर्ष ४०.६० प्रतिशत बढाएको छ । अघिल्लो वर्ष २ अर्ब ८५ करोड ४६ लाख ३८ हजार रुपैयाँ नाफा गरेको एनएमबीले गत वर्ष ४ अर्ब १ करोड ३६ लाख ७१ हजार रुपैयाँ नाफा गरेको छ ।
सिद्धार्थ बैंकले गत वर्ष ३ अर्ब ५१ करोड ९४ लाख ९ हजार रुपैयाँ नाफा गरेको छ । अघिल्लो वर्षको नाफा ३ अर्ब ३६ करोड ६५ लाख ९४ हजार रुपैयाँको तुलनामा ४.५४ प्रतिशत बढी हो ।
गत वर्ष लक्ष्मी सनराईज बैंकले ३ अर्ब ११ करोड ७१ लाख ३१ हजार रुपैयाँ नाफा गरेको छ । जुन अघिल्लो वर्षको ४ अर्ब ६ करोड २० लाख ४५ हजार रुपैयाँको तुलनामा २३.२६ प्रतिशतले थोरै हो ।
स्ट्याण्डर्ड र्चार्ड बैंकले समीक्षा अवधिमा २ अर्ब ८५ करोड २ लाख १० हजार रुपैयाँ खुद नाफा कमाएको छ । जुन अघिल्लो आर्थिक वर्षको ३ अर्ब १ करोड २५ लाख ६३ हजार रुपैयाँको तुलनामा ५.३८ प्रतिशतले थोरै हो ।
सानिमा बैंकले गत आर्थिक वर्ष २ अर्ब ८३ करोड १७ लाख ७६ हजार रुपैयाँ नाफा गरेको छ । जुन नाफा अघिल्लो वर्षको २ अर्ब १० करोड २९ लाख ६ हजार रुपैयाँको तुलनामा ३४.६६ प्रतिशतले बढी हो ।
नेपाल इन्भेष्टमेण्ट मेगा बैंकले गत आर्थिक वर्षमा २ अर्ब ७४ करोड ७२ लाख रुपैयाँ खुद नाफा कमाएको छ । जुन अघिल्लो आर्थिक वर्षको ४ अर्ब ३३ करोड २२ लाख ८२ हजार रुपैयाँको तुलनामा ३६.५८ प्रतिशतले थोरै हो ।
कृषि बिकास बैंकले गत वर्ष २ अर्ब ६३ करोड ६ लाख रुपैयाँ खुद नाफा कमाएको छ । जुन नाफा अघिल्लो आर्थिक वर्षको ३ अर्ब ७३ करोड २४ लाख रुपैयाँको तुलनामा २९.५२ प्रतिशतले थोरै हो ।
माछापुच्छ्रे बैंकले गत वर्ष २ अर्ब ११ करोड ४१ लाख २० हजार रुपैयाँ नाफा गरेको छ । जुन नाफा अघिल्लो वर्षको १ अर्ब ८८ करोड ३६ लाख ४३ हजार रुपैयाँको तुलनामा १२.२४ प्रतिशत बढी हो ।
सिटिजन्स बैंक इन्टरनेसनलको गत वर्ष ६३.०५ प्रतिशतले नाफा बढाएको छ । सिटिजन्सले अघिल्लो वर्ष १ अर्ब २८ करोड ७० लाख ७५ हजार रुपैयाँ नाफा कमाएकोमा गत वर्ष भने बढाएर २ अर्ब ९ करोड ८६ लाख ३ हजार रुपैयाँ पुर्याएको छ ।
उता, नेपाल एसबीआई बैंकले गत वर्ष २ अर्ब ४ करोड ४३ लाख ३० हजार रुपैयाँ नाफा गरेको छ । अघिल्लो वर्ष १ अर्ब ८१ करोड ९ लाख ६० हजार रुपैयाँ नाफा गरेको नेपाल एसबीआईले नाफा १२.८९ प्रतिशतले बढाएको हो ।
वृद्धिदरको हिसाबले हिमालयन बैंकको पारी चकित बनाउने खालको छ । हिमालयनले गत वर्ष १ अर्ब ४८ करोड ३ लाख ८५ हजार रुपैयाँ खुद नाफा गरेको छ । जुन नाफा गत वर्षको १२ करोड ९७ लाख २६ हजार रुपैयाँको तुलनामा १०४१.१६ प्रतिशतले बढी हो ।
एनआईसी एशिया बैंकले गत वर्ष १८ करोड १७ लाख २ हजार रुपैयाँ नाफा कमाएको छ । बैंकले एक वर्षको अवधिमा नाफामा चमत्कारै गरेको छ । अघिल्लो आर्थिक वर्ष बैंक ३ अर्ब ८७ करोड २० लाख ४२ हजार रुपैयाँ नोक्सानीमा थियो ।
प्रकाशित वित्तीय विवरण अनुसार गत वर्ष प्रभू बैंक मात्र नोक्सानीमा गएको छ । अघिल्लो वर्ष ८७ करोड २३ लाख २६ हजार रुपैयाँ नाफामा रहेको प्रभू बैंक गत वर्ष भने २४ करोड १२ लाख ४३ हजार रुपैयाँ नोक्सानीमा गएको छ ।
सम्बन्धित खबर
