नेपाल–चीन सीमामा अत्याधुनिक व्यापारिक पूर्वाधार बनाउन दुवै देश सहमत

काठमाडौं । नेपाल–चीन सीमा व्यापार तथा सहयोग समन्वय संयन्त्र (नेपाल–चाइना कोअर्डिनेशन मेकानिजम अन बोर्डर ट्रेड एण्ड कर्पोरेशन) को तेस्रो वाणिज्य सचिवस्तरीय बैठक सम्पन्न भएको छ । चीनको सिजाङ स्वायत्त क्षेत्रको राजधानी ल्हासामा माघ ६–७ गते सम्पन्न भएको बैठकमा द्विपक्षीय व्यापार, भन्सार सहजीकरण, पूर्वाधार विकास, लगानी तथा अन्य सहकार्यका विषयमा महत्त्वपूर्ण उपलब्धि र सहमतिहरू भएको उद्योग वाणिज्य तथा आपूर्ति मन्त्रालयले जनाएको छ । नेपाली प्रतिनिधिमण्डलको नेतृत्व उद्योग, वाणिज्य तथा आपूर्ति मन्त्रालयका सचिव डा.रामप्रसाद घिमिरेले गरेका थिए भने चिनियाँ पक्षको नेतृत्व सिजाङ जनसरकारका उपाध्यक्ष महामहिम चाओ पेङले गरेका थिए ।

बैठकमा संखुवासभा जिल्लाको सीमानाका किमाथांकामा सडक, मितेरी पुल, नेपालको किमाथांका र चीनको सिजास्वायत्त क्षेत्र (छेन्ताङ)मा जोड्ने सडक र सुक्खा बन्दरगाह (आइसिडी) निर्माणका लागि नेपालले प्रस्ताव गरेको थियो । नेपालको प्रस्तावमा कूटनीतिक माध्यमबाट अगाडि बढाउन दुई पक्षबिच समझदारी भएको हो ।

त्यस्तै, रसुवा (जिलोङ)को टिमुरेस्थित सुक्खा बन्दरगाह निर्माणकार्यलाई निरन्तरता दिने, मुस्ताङको कोरला नाकाको दुवैतर्फ भन्सार प्रक्रिया सहज बनाउने र कोरला नाकामा सुक्खा बन्दरगाह निर्माण गर्ने प्रक्रियालाई तीव्रता दिने विषयमा समेत समझदारी भएको हो । हिल्सा–सिमिकोट सडक र रसुवा स्याफ्रुबेँसी सडक निर्माणकार्यमा नेपालको तर्फबाट सहजीकरण गर्ने तथा चीनको तर्फबाट निर्माणकार्यलाई तीव्रता दिने विषयमा समेत समझदारी भएको उद्योग, वाणिज्य तथा आपूर्ति मन्त्रालयले जनाएको छ । 

सन् २०२४ नोभेम्बरमा काठमाडौंमा सम्पन्न दोस्रो बैठकको निर्णय तथा सहमति कार्यान्वयनको प्रगति समीक्षा गरिएको थियो । 

बैठकमा नेपाल–चीन उच्च प्रविधियुक्त कृषिपार्क निर्माण परियोजना अगाडि बढाउने सहमति भएको उद्योग, वाणिज्य तथा आपूर्ति मन्त्रालयले जनाएको छ । त्यस्तै, दुवै पक्षले अथोराइज्ड इकोनोमिक अपरेटर (एइओ) प्रमाणीकरणको अवधारणा कार्यान्वयन तथा परम्परागत चिकित्सा क्षेत्रमा आपसी सहकार्य सुदृढ गर्ने विषयमा समेत सहमति भएको हो । बैठकमा चीनको जिलोङ र रसुवा जिल्लाको कुनै एक नगरपालिकाबिच भगिनी सम्बन्ध स्थापना गर्न चीनले प्रस्ताव गरेको थियो ।