चमेलिया र महाकाली नदी तटीय क्षेत्रमा विपद् पूर्वसूचना प्रणाली स्थापना गर्न एमाले सांसद ठगुन्नाको माग

काठमाडौं ।  नेकपा (एमाले)का सांसद गणेश सिंह ठगुन्नाले दार्चुलाको चमेलिया र महाकाली नदी तटीय क्षेत्रमा विपद् पूर्वसूचना प्रणाली स्थापना गर्न सरकारसँग माग गरेका छन् । 

प्रतिनिधि सभाको बुधवारको बैठकमा बोल्दै उनले यस्तो माग गरेका हुन् ।

उनी प्रत्येक वर्ष मनसुनको समयमा दार्चुलाका अपिहिमाल, मार्मा र लेकम गाउँपालिका तथा महाकाली नदी तटीय क्षेत्रका नागरिक जोखिम मोलेर बस्ने गरेको बताए । सांसद ठगुन्नाले चमेलिया नदी किनारमा रहेको दार्चुलाको दोस्रो ठूलो बजार गोकुलेश्वरमा अविलम्ब पक्की तटवन्ध निर्माण गर्न सरकारको ध्यानाकर्षण गराए । उनले गोकुलेश्वरमा तटबन्ध निर्माणका लागि विगतमा तयार गरिएको विस्तृत परियोजना प्रतिवेदन (डीपीआर) सहितको बहुवर्षीय फाइल अर्थ मन्त्रालयमा अड्किएको बताए ।

उनले उक्त ठेक्का तत्काल स्वीकृत गर्न अर्थमन्त्रीको ध्यानाकर्षण गराए। उनले रसुवाको भोटेकोशीमा आएको बाढीमा परी जलविद्युत आयोजनामा कार्यरत कर्मचारीको उद्धार प्रक्रियालाई थप प्रभावकारी बनाउन समेत सरकारको ध्यानाकर्षण गराए ।