विशाल ग्रुपद्वारा बाढी प्रभावितका लागि २ करोड ५१ लाख सहयोग

काठमाडौं । भोटेकोशी बाढी प्रभावित नागरिकको राहत, उद्धार तथा पुनःस्थापनाका लागि विशाल ग्रुपले प्रधानमन्त्री दैवी प्रकोप उद्धार कोषमा २ करोड ५१ लाख रुपैयाँ सहयोग गरेको छ ।

बाढीबाट भएको अपूरणीय क्षतिप्रति दुःख व्यक्त गर्दै सामाजिक उत्तरदायित्वअन्तर्गत विशाल ग्रुप तथा त्यससँग सम्बन्धित कम्पनीहरूबाट प्राप्त उक्त सहयोग रकमको चेक अर्थमन्त्री स्वर्णिम वाग्लेलाई हस्तान्तरण गरेको जनाएको छ ।

ग्रुपका प्रबन्ध निर्देशक अशोककुमार अग्रवालले अर्थमन्त्री वाग्लेलाई बुधबार भेटेर सो रकमको चेक हस्तान्तरण गरेका हुन् ।

विशाल ग्रुपले बाढीका कारण दिवंगत भएका नागरिकप्रति श्रद्धाञ्जली तथा परिवारप्रति समवेदना व्यक्त गर्दै बाढीमा परेर घाइते भएकाहरूको शीघ्र स्वास्थ्यलाभको कामनासमेत गरेको छ ।