सरकारको नेतृत्व गर्नेबाट नै संविधानका उपलब्धिमाथि प्रश्न उठाउने प्रयास भइरहेको छः भीष्मराज आङ्देम्बे

काठमाडौँ । नेपाली काँग्रेस संसदीय दलका नेता भीष्मराज आङ्देम्बेले सरकारको नेतृत्व गर्नेहरुबाट नै संविधानका उपलब्धिमाथि प्रश्न उठाउने प्रयास भइरहेको आरोप लगाएका छन् । 

३२ औँ विश्व आदिवासी दिवसका अवसरमा आयोजित कार्यक्रममा उनले संविधानले सुनिश्चित गरेका उपलब्धिमाथि कार्यकारी निकायबाटै पटक-पटक घोचपेच हुने गरेको आरोप लगाएका हुन् । उनले संविधानको रक्षा गर्ने जिम्मेवारी पाएको कार्यकारी निकायले नै संविधानमा समेटिएका उपलब्धिमाथि प्रश्न उठाउने अवस्था आउनु गम्भीर विषय भएको बताए । संविधानले आदिवासी जनजातिसहित महिला, दलित, मधेसी, मुस्लिम, थारू तथा अन्य सीमान्तकृत समुदायका पहिचान, अधिकार र प्रतिनिधित्वलाई लिपिवद्ध गरेको उल्लेख गर्दै उनले ती उपलब्धिहरु कसैको निगाहमा प्राप्त नभएको बताए । संविधानमा लिपिवद्ध भएका अधिकार विगतका पुस्ताले लामो संघर्ष गरेर पाएको र संघर्षबाट प्राप्त उपलब्धिलाई कसैको राजनीतिक भाषण वा भीड जम्मा गर्ने विषय बनाउन नहुने उनको भनाइ छ । उनले उपलब्धीको रक्षाको लागि आदीवासी जनजाती समुदाय एकजुट हुन नसकेकोमा पनि असन्तुष्टी जनाए । सामाजिक सञ्जालमा अधिकारका विषयमा ठूलो आवाज उठाउने गरेपनि अधिकार संरक्षणका लागि आवश्यक एकता र शक्ति प्रदर्शन गर्ने समयमा उपस्थित नहुने गरेको उनको भनाई छ । उनले अधिकारका लागि समुदाय आफैँ सचेत र संगठित हुनुपर्नेमा जोड दिए । २०७२ सालमा संविधान जारी गर्दा एकातर्फ दीपावली र अर्कोतर्फ संविधान जलाउने अवस्था देखिएको स्मरण पनि गरे । संविधान जारी गर्ने क्रममा असन्तुष्ट समुदायका मागलाई आगामी संवैधानिक अभ्यास र संशोधनमार्फत सम्बोधन गर्ने प्रतिवद्धता व्यक्त गरिएको उल्लेख गर्दे उनले संविधान संसोधनका क्रममा ती मुद्दाहरुलाई पनि ध्यान दिनुपर्ने बताए । आदिवासी जनजाति, महिला, दलित, मधेसी, मुस्लिम, थारू तथा सीमान्तकृत समुदायसँग गरिएका प्रतिवद्धता संशोधनका क्रममा समेटिनुपर्ने उनको भनाई छ । उनले सरकारले संविधान संशोधनका लागि गठन गरेको समितिका विषयमा नेपाली काँग्रेसको केही ‘रिजर्भेसन’ रहेको उल्लेख गर्दै आदिवासी जनजातिले पनि यसमा गम्भीर र सचेत हुनुपर्ने बताए ।

दोस्रो जनआन्दोलनबाट प्राप्त उपलब्धिमाथि अझै प्रश्न उठिरहेको उनको भनाई छ । धर्मनिरपेक्षता, संघीयता, प्रदेश संरचना तथा समानुपातिक समावेशी प्रतिनिधित्व संविधानको मुल मर्म रहेको उनले बताए । संविधानका यी उपलब्धीमाथी नै सरकारको नेतृत्व गर्नेहरुले प्रश्न उठाउने गरेकोले आशंका पैदा भएको उनको भनाई छ । आङ्देम्बेले संविधानबाट प्राप्त अधिकारको संरक्षणका लागि नेपाली काँग्रेसले सरकारलाई संसद् र सडक दुवैबाट खबरदारी गर्ने बताए । संविधानप्रदत्त अधिकार सुनिश्चित गर्न काँग्रेस निरन्तर आदीवासी जननजाती समुदायहरूसँगै रहने उनले प्रतिबद्धता पनि जनाए ।