अटो शोमा हुण्डाईको धमाका, मेड इन नेपाल भेन्यूसहित विभिन्न ब्रान्ड प्रदर्शनमा

काठमाडौँ । साउन २६ गतेदेखि ३१ गतेसम्म भृकुटीमण्डपमा आयोजना हुने ‘नाइमा नेपाल मोबिलिटी एक्स्पो २०२६’ मा लक्ष्मी ग्रुप अन्तर्गतको लक्ष्मी इन्टरकन्टिनेन्टलले नयाँ मोडलदेखि नयाँ ब्रान्डसम्मको आकर्षक लाइनअप प्रस्तुत गर्ने भएको छ । एक्स्पोमा कम्पनीले सबैभन्दा ठूलो आकर्षणका रूपमा मेड इन नेपाल नयाँ जेनेरेशनको हुन्डाई भेन्यू एन लाइन सार्वजनिक गर्ने तयारी गरेको छ। यो नवलपरासीस्थित एसेम्बली प्लान्टमा उत्पादन गरिएको हो ।

हुण्डाईका साथै लक्ष्मी ग्रुपले आफ्ना अन्य ब्रान्ड काई र फोर्थिङ का सवारीसाधन पनि प्रदर्शनीमा राख्ने जनाएको छ । यसपटकको एक्स्पोमा लक्ष्मी ग्रुपले नेपालमा पहिलो पटक दुई नयाँ चिनियाँ ब्रान्ड बीएआइसी र आर्कफक्स समेत भित्र्याउँदैछ । बीएआइसी अन्तर्गत कम्पनीले ‘बी सिरिज’ का शक्तिशाली अफरोडर गाडीहरू प्रदर्शन गर्नेछ, जुन नेपालको भौगोलिक अवस्थालाई लक्षित गरेर ल्याइएका मोडलहरू हुन् ।

त्यसैगरी, आर्कफक्स ब्रान्डअन्तर्गत आर्कफक्स टी-वान ईभी सार्वजनिक गरिनेछ । कम्पनीका अनुसार यो मास मार्केटलाई लक्षित गरिएको बजेट-मैत्री र आकर्षक डिजाइन भएको विद्युतीय गाडी हो । लक्ष्मी ग्रुपका अनुसार नाइमा मोबिलिटी एक्स्पो २०२६ मा हुण्डाईको नयाँ एन लाइन भर्सनदेखि नेपालमै एसेम्बल गरिएको भेन्यू, अफरोडर एसयूभी र नयाँ ईभीसम्मका मोडलहरू मुख्य आकर्षणका रूपमा रहनेछन् ।

यद्यपि, कम्पनीले जेटोर ब्रान्डलाई भने नाइमा एक्स्पोमा नभई आगामी नाडा अटो शो २०२६ मार्फत नेपालमा पहिलो पटक सार्वजनिक गर्ने तयारी गरेको जनाएको छ। विशेषगरी जेटोरका प्लग-इन हाइब्रिड मोडलहरू नाडा अटो शोका मुख्य आकर्षण बन्ने अपेक्षा गरिएको छ।