नेपाल राष्ट्र बैंकद्वारा ४५ अर्ब रुपैयाँको निक्षेप संकलन उपकरण जारी

नेपाल राष्ट्र बैंकले वित्तीय प्रणालीमा रहेको अधिक तरलता व्यवस्थापन गर्ने उद्देश्यले आज शुक्रबार ४५ अर्ब रुपैयाँ बराबरको निक्षेप संकलन उपकरण बोलकबोलमार्फत निष्कासन गर्दैछ। बैंक तथा वित्तीय संस्थाहरूमा निक्षेपको थुप्रो लागेर हाल कुल निक्षेप साढे ७७ खर्ब रुपैयाँ नाघिसकेको अवस्थामा ब्याजदरमा आउन सक्ने तीव्र उतारचढावलाई नियन्त्रण गर्न केन्द्रीय बैंकले यो कदम चालेको हो। १४ दिनको अवधिका लागि बोलकबोल गर्न लागिएको यो उपकरणमा इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन्।

केन्द्रीय बैंकले खुला बजार कारोबार सञ्चालन कार्यविधिअनुसार बजारमा दीर्घकालीन प्रकृतिको अधिक तरलता देखिएपछि त्यसलाई खिच्न संरचनात्मक हस्तक्षेप गरेको हो। यस प्रक्रियामा सहभागी हुन चाहने संस्थाहरूले घटीमा १० करोड र बढीमा कुल आह्वान रकमसम्म ५ करोड रुपैयाँले भाग जाने गरी आवेदन दिन सक्नेछन्। अनलाइन खरिद प्रणालीमार्फत हुने यस बोलकबोलमा सबैभन्दा कम ब्याजदर प्रस्ताव गर्ने काउन्टर पार्टीहरूलाई प्राथमिकतामा राखेर रकम बाँडफाँट गरिने राष्ट्र बैंकले स्पष्ट पारेको छ।

बजारको ब्याजदरलाई वाञ्छित सीमाभित्र राख्न र तरलता सन्तुलन मिलाउन राष्ट्र बैंकले पछिल्लो समय निक्षेप संकलन र स्थायी निक्षेप सुविधाजस्ता उपकरणहरूको निरन्तर प्रयोग गर्दै आएको छ। आज संकलन गरिने यस निक्षेपको सावाँ तथा ब्याज भुक्तानी आगामी २०८३ असार १२ गते हुने तालिका निर्धारण गरिएको छ। वित्तीय बजारको आवश्यकताअनुसार कार्यसमितिले बढीमा ६ महिनासम्मको अवधिका लागि यस्ता उपकरणहरू प्रयोग गर्न सक्ने प्रावधान रहेकाले तरलताको चापलाई हेर्दै केन्द्रीय बैंकले पटक-पटक यस्तो सक्रियता देखाउँदै आएको छ।