शंकर पोखरेलको निर्वाचन खर्च १७ लाख ५० हजार

काठमाडौं । प्रतिनिधि सभा सदस्य निर्वाचन २०८२ मा दाङ–२ बाट उम्मेदवार बनेका नेकपा एमालेका महासचिव शंकर पोखरेलले सबै निर्वाचन खर्च सार्वजनिक गरेका छन् । 

निर्वाचन आयोगमा पेस गरिएको विवरणअनुसार उनले चुनावी प्रचारप्रसार तथा व्यवस्थापनका विभिन्न शीर्षकमा कुल १७ लाख ५० हजार रुपैयाँ खर्च गरेको उल्लेख गरेका छन् ।

खर्च विवरण अनुसार सबैभन्दा धेरै रकम सवारी साधनमा ३ लाख ५० हजार रुपैयाँ र सवारी इन्धन (घोडा प्रयोग गरिएको दाना समेत) मा ३ लाख रुपैयाँ खर्च गरिएको देखिन्छ । त्यस्तै प्रचारप्रसार सामग्रीमा १ लाख ५० हजार रुपैयाँ, ढुवानीमा १ लाख ५० हजार रुपैयाँ तथा गोष्ठी अन्तरक्रियामा १ लाख ५० हजार रुपैयाँ खर्च गरिएको उल्लेख छ । मतदाता नामावली खरिदका लागि ५० हजार रुपैयाँ खर्च भएको विवरणमा उल्लेख छ ।

यसैगरी अन्य प्रचारप्रसार, छापा तथा विद्युतीय माध्यममा २ लाख रुपैयाँ, कार्यालय सञ्चालनमा १ लाख ५० हजार रुपैयाँ, प्रतिनिधि परिचालनमा १ लाख रुपैयाँ र विविध शीर्षकमा १ लाख ५० हजार रुपैयाँ खर्च गरिएको विवरणमा उल्लेख गरिएको छ ।