निर्वाचनलाई लक्षित गर्दै सार्वजनिक बिदामा पनि बैंकिङ सेवा सञ्चालन गर्न राष्ट्र बैंकको निर्देशन

काठमाडौं । सरकारले सार्वजनिक बिदा दिएको भए तापनि आगामी फागुन २१ गते हुने प्रतिनिधिसभा सदस्य निर्वाचनका दिन बाहेक बैंकिङ सेवा प्रवाह गर्ने व्यवस्था मिलाउन बैंकहरूलाई राष्ट्र बैंकले निर्देशन दिएको छ । केन्द्रीय बैंकले मंगलबार एक सूचना जारी गर्दै मतदानको दिन बाहेक अन्य सार्वजनिक बिदाका दिनहरूमा पनि बैंकिङ सेवा सुचारु राख्न निर्देशन दिएको हो ।

निर्वाचन आयोगको अनुरोधमा केन्द्रीय बैंकले जारी गरेको सूचना अनुसार, फागुन २१ गते मुलुकभरका मतदाताले मतदान गर्ने दिन बाहेकका अन्य घोषित सार्वजनिक बिदाका दिनहरूमा निश्चित बैंकिङ सेवाहरू उपलब्ध हुनेछन् ।

निर्वाचनका लागि मिति २०८२ फागुन २१ गते हुने मतदानका दिन बाहेक फागुन २०, २१ र २२ गते सार्वजनिक बिदा घोषणा गरिएको छ। साथै फागुन १८ र १९ गते होली पर्व (फागु पूर्णिमा) का अवसरमा पनि सार्वजनिक बिदा रहने भएकाले ती अवधिमा आवश्यक बैंकिङ सेवा सञ्चालन गर्न निर्देशन जारी गरिएको हो ।

राष्ट्र बैंकको निर्देशन अनुसार फागुन २१ गते (मतदानको दिन) बाहेकका सार्वजनिक बिदाका दिनहरूमा पनि बैंक तथा वित्तीय संस्थाहरूले निश्चित बैंकिङ सेवा प्रदान गर्नेछन् । सरकारी कारोबार गर्न तोकिएका वाणिज्य बैंकहरूले भुक्तानी व्यवस्था र राजस्व दाखिलाका कार्यहरू सुचारु राख्नुपर्ने निर्देशनमा उल्लेख छ ।

यस्तै, निर्वाचन प्रचारप्रसारका लागि बैंक खाता सञ्चालन गर्ने राजनीतिक दल तथा उम्मेदवारहरूका लागि नगद वा चेक जम्मा गर्ने तथा भुक्तानी दिने लगायतका आवश्यक बैंकिङ सेवाहरू प्रदान गर्नुपर्ने केन्द्रीय बैंकले जनाएको छ ।

निर्वाचन आयोगको २०८२ फागुन १९ गतेको निर्णय बमोजिम उम्मेदवार र राजनीतिक दलहरूको आर्थिक कारोबारलाई सहज बनाउन र सरकारी राजस्व तथा भुक्तानी प्रक्रियालाई नरोक्न राष्ट्र बैंकले यो कदम चालेको जनाएको छ ।