५ महिनामा ३ लाख ४० हजारले श्रम स्वीकृति लिँदा ८७० अर्ब रेमिट्यान्स

काठमाडौं । चालु आर्थिक वर्षको पाँच महिनामा ८७० अर्ब ३१ करोड रुपैयाँ बराबरको रेमिट्यान्स भित्रिएको छ । नेपाल राष्ट्र बैंकले शुक्रबार सार्वजनिक गरेको देशको वर्तमान आर्थिक तथा वित्तीय स्थितिअनुसार पाँच महिनामा रेमिट्यान्स ३५.६ प्रतिशतले बढेको हो ।

राष्ट्र बैंकका अनुसार २०८२ मङ्सिरमा मात्र १८३ अर्ब १८ करोड रुपैयाँ रेमिट्यान्स भित्रिएको छ, जुन अघिल्लो वर्षको सोही महिनाको ११८ अर्ब ७९ करोड रुपैयाँभन्दा बढी हो । समीक्षा अवधिमा अमेरिकी डलरमा रेमिट्यान्स आप्रवाह २९ प्रतिशतले वृद्धि भई ६ अर्ब १६ करोड अमेरिकी डलर पुगेको छ । अघिल्लो वर्ष सोही अवधिमा यस्तो वृद्धि दर ३.४ प्रतिशतमा सीमित थियो ।

यस अवधिमा खुद द्वितीय आय (खुद ट्रान्सफर) ९५४ अर्ब ७८ करोड रुपैयाँ पुगेको छ, जुन अघिल्लो वर्षको ७०० अर्ब ४३ करोड रुपैयाँको तुलनामा उल्लेख्य वृद्धि हो । यस्तै, वैदेशिक रोजगारीतर्फ जाने नेपालीको संख्या उच्च नै रहेको छ । पाँच महिनामा वैदेशिक रोजगारीका लागि नयाँ अन्तिम श्रम स्वीकृति लिनेको संख्या १ लाख ७५ हजार ५९१ पुगेको छ भने पुनः श्रम स्वीकृति लिनेको संख्या १ लाख ६३ हजार ९२४ रहेको छ।