जेनजी आन्दोलनमा क्षति पुगेका बागमती प्रदेशका सवारीले कर छुट पाउने

काठमाडौं । जेनजी आन्दोलनमा पूर्ण रूपमा क्षति भएका सवारी साधनले कर छुट पाउन भएका छन् । बागमती प्रदेश सरकारले जेनजी आन्दोलनको बेला क्षति पुगेका सवारी साधनलाई विशेष कर छुट दिने निर्णय गरेको छ ।

बागमती प्रदेश मन्त्रिपरिषद्को गत पुस १६ गतेको निर्णयलाई प्रदेशले राजपत्रमा प्रकाशन गर्दै कर छुट दिने निर्णयलाई मान्यता दिएको हो । 

जेनजी आन्दोलनका क्रममा आगजनी वा तोडफोड भई पूर्ण रूपमा क्षति भएका सरकारी, निजी, पर्यटकीय तथा सार्वजनिक सवारी साधनको लगत कट्टा गर्न चाहेमा चालु आर्थिक वर्ष २०८२/८३ को सवारी साधन कर र नवीकरण दस्तुरमा शतप्रतिशत छुट पाउने छन् ।

सार्वजनिक सवारी साधनको हकमा भने थप सहुलियत दिँदै सवारी कर र नवीकरण दस्तुरका साथै जाँच पास र बाटो इजाजत पत्र, नवीकरण दस्तुर समेत मिनाहा गरिएको छ । प्रदेश सरकारले दिएको सुविधा लिन सवारी धनीले प्रहरी मुचुल्कासहित पूर्ण क्षति भएको पुष्ट्याइँ गर्ने कागजात पेस गर्नुपर्ने व्यवस्था गरिएको छ । 

त्यसैगरि, जेनजी आन्दोलनका कारण यातायात कार्यालयको सेवा अवरुद्ध भएको अवधिमा राजस्व तिर्ने अन्तिम म्याद परेका सवारी साधनले आगामी माघ मसान्तसम्म दस्तुर बुझाउन आएमा बाटो इजाजत पत्र र जाँच पास नवीकरणमा लाग्ने जरिवाना तथा थप जरिवाना छुट पाउने छन् ।