वर्षाले बाढी प्रभावितको जनजीवन थप कष्टकर, राहतमा प्राप्त खाद्यान्न, लत्ताकपडा जोगाउन समेत कठिन

नुवाकोट । भोटेकोशी हुँदै त्रिशूली नदीमा आएको बाढीबाट प्रभावित भएर अस्थायी टहरा तथा टेन्टमा बस्दै आएका परिवार निरन्तरको वर्षाका कारण थप समस्यामा परेका छन् । बिहीबारदेखि सुरु भएको वर्षा शुक्रबार पनि नरोकिएपछि खुला स्थानमा बनाइएका अस्थायी संरचनामा पानी पस्न थालेको छ । टेन्टभित्र पानी पसेपछि राहतमा प्राप्त खाद्यान्न, लत्ताकपडा तथा अन्य सामग्री जोगाउन समेत कठिन भएको रसुवाबाट विस्थापित भई नुवाकोटमा बस्दै आएका उत्तरगया गाउँपालिका–१ का वडाध्यक्ष मानसिंह तामाङले बताए ।

उनका अनुसार टेन्टको छानाबाट पानी चुहिनुका साथै जमिनबाट बगेको भलसमेत भित्र पस्दा प्रभावित परिवारको दैनिकी थप कष्टकर बनेको छ । रसुवाबाट विस्थापित भएर नुवाकोटका विभिन्न स्थानमा बस्दै आएका ३४४ परिवारमध्ये १४२ परिवार विदुर नगरपालिका–५, बाणाचौतारोमा अस्थायी टेन्टमा बसिरहेका छन् ।

टेन्टमा पानी चुहिएपछि राहतमा प्राप्त खाद्यान्न र लत्ताकपडा भिज्नुका साथै ज्येष्ठ नागरिक र बालबालिकालाई समस्या भएको खाल्डेबाट विस्थापित भई बाणाचौतारोमा बस्दै आएका दावामिङ्मार तामाङले बताए । “टेन्टमा पानी पसेपछि सामान जोगाउनै समस्या भएको छ । जमिन हिलाम्मे बनेको छ भने चिसो बढेपछि ज्येष्ठ नागरिक र बालबालिकालाई बढी समस्या भएको छ,” उनले भने ।

अस्थायी संरचनामा बस्दै आएका प्रभावितको टेन्टमा पानी चुहिन नदिन नेपाल रेडक्रस सोसाइटी नुवाकोट शाखाले त्रिपाल उपलब्ध गराएर सहयोग गरिरहेको छ । शाखाका मन्त्री उद्धव शर्मा रिजालका अनुसार बाणाचौतारोसहित जिल्लाका पाँच स्थानमा रहेका प्रभावितको टेन्टमा त्रिपाल ओढाउने र जमिनबाट बगेको पानी भित्र पस्न नदिन पानी निकासको व्यवस्था मिलाउने काममा स्वयंसेवक परिचालन गरिएको छ ।

“वर्षाका कारण प्रभावितको बसाइ थप कष्टकर बनेपछि टेन्टमा त्रिपाल ओढाउने र पानीको निकास बनाउने काम भइरहेको छ,” उनले भने, “आज साँझसम्म सबै स्थानमा रहेका प्रभावितको टेन्टमा त्रिपाल लगाउने काम सक्ने लक्ष्य छ ।” निरन्तरको वर्षाले बाढीले पुरिएका संरचनाको भग्नावशेष हटाएर सामग्री निकाल्ने तथा खोज तथा उद्धारको कामसमेत प्रभावित भएको छ । त्रिशूली बजार तथा त्रिशूली नदीको पारिपट्टि बाढीले पुरिएका संरचनामा भइरहेको खोज तथा उद्धारमा वर्षाका कारण कठिनाइ भएको विदुर नगरपालिकाका प्रमुख राजन श्रेष्ठले बताए ।

बाढीले पुरिएका संरचनाको भग्नावशेष हटाएर सुरक्षित सामग्री निकाल्न विदुर नगरपालिका तथा विभिन्न संघसंस्थाले प्रभावित परिवारलाई सहयोग गरिरहेका छन् । तर, लगातारको वर्षाले भग्नावशेष तथा आसपासको क्षेत्र हिलाम्मे बनेपछि खोज तथा उद्धारसँगै सामग्री निकाल्ने काममा कठिनाइ भइरहेको श्रेष्ठले बताए ।

भोटेकोशी हुँदै त्रिशूली नदीमा आएको बाढीका कारण नुवाकोटमा दुई हजार १०० भन्दा बढी घरपरिवार प्रत्यक्ष प्रभावित भएर घरबारविहीन भएका छन् । भाडामा बस्दै आएका तथा व्यवसाय सञ्चालन गर्ने परिवारसमेत जोडिँदा बाढीपछि जिल्लामा दुई हजार ५०० भन्दा बढी परिवार प्रभावित भएको जिल्ला प्रशासन कार्यालय नुवाकोटको तथ्यांक छ ।

बाढीबाट विस्थापित केही परिवारले घर तथा बाढीले पुरिएका संरचनाबाट सामग्री निकाल्न सफल भए पनि धेरै परिवार अझै अस्थायी संरचना र राहत सामग्रीको भरमा बसिरहेका छन् । लगातारको वर्षाले चिसो बढेपछि विशेषगरी बालबालिका, ज्येष्ठ नागरिक, सुत्केरी तथा बिरामीलाई थप समस्या भएको छ । बाढीपछि अस्थायी संरचनामा आश्रय लिइरहेका परिवारको जनजीवन वर्षाका कारण झन् कठिन बनेको छ । राहत, सुरक्षित आवास र उद्धारका काम भइरहे पनि प्रतिकूल मौसमले प्रभावितको दैनिक जीवनमा थप चुनौती थपिएको छ ।