अस्पताल बाहिरै शिशु जन्माएको घटनामा कर्मचारीमाथि कारबाही सिफारिस

काठमाडौं । राजविराजस्थित गजेन्द्र नारायण सिंह अस्पतालमा प्रसूति सेवाका लागि पुगेकी बबिता पासवानले पैसा नभएका कारण सडक पेटीमै शिशु जन्माएको घटनामा छानबिन समितिले अस्पताल प्रशासन, स्वास्थ्यकर्मी र आमा सुरक्षा कार्यक्रम कार्यान्वयनमा कमजोरी औंल्याएको छ ।

समितिका अनुसार अस्पताल पुगेकी गर्भवतीलाई उपचारका लागि रोक्न, आवश्यक परामर्श दिन तथा उनको अवस्थाबारे खोजी गर्न ड्युटीमा रहेका चिकित्सक, नर्स, प्यारामेडिक्सलगायत कर्मचारीबाट कमजोरी भएको देखिएको छ । उनीहरूसहित थप केही व्यक्तिमाथि विभागीय कारबाही गर्न सिफारिस गरिएको छ।

समितिले सेवाग्राही र स्वास्थ्यकर्मीबीचको बुझाइको कमी, गरिबी, अशिक्षा तथा स्वास्थ्य सेवासम्बन्धी जानकारीको अभावलाई पनि घटनाका कारण मानेको छ । साथै, अस्पतालमा कार्यरत स्वास्थ्यकर्मीलाई नै आमा सुरक्षा कार्यक्रम अन्तर्गत उपलब्ध सेवाबारे पर्याप्त जानकारी नभएको पाइएको जनाएको छ ।

प्रसूति सेवा मात्रै नभई त्यससँग सम्बन्धित आवश्यक प्रयोगशाला परीक्षणसमेत निःशुल्क हुने व्यवस्था स्पष्ट गर्नुपर्ने समितिको निष्कर्ष छ । अस्पतालमा आइसकेकी बिरामी दुई-तीन घण्टासम्म बाहिर रहँदा पनि खोजी नगर्नु प्रशासनिक कमजोरी भएको समितिले जनाएको छ ।

नेपाल मेडिकल काउन्सिलका रजिष्ट्रार डा.सुप्रभात श्रेष्ठको संयोजकत्वमा गठित टोलीले भदौ २५ देखि २७ गतेसम्म स्थलगत अध्ययन गरी प्रतिवेदन स्वास्थ्य मन्त्रालयमा बुझाइसकेको छ ।