असोजमा अधिकांश वाणिज्य बैंकको ब्याजदर यथावत, औसत निक्षेपदर घट्यो

काठमाडौं । वाणिज्य बैंकहरूले आगामी असोज २०८३ का लागि नयाँ ब्याजदर सार्वजनिक गरेका छन् । सार्वजनिक गरिएको नयाँ दरअनुसार अधिकांश बैंकले भदौकै ब्याजदरलाई निरन्तरता दिएका छन् भने केही बैंकले व्यक्तिगत तथा संस्थागत निक्षेपको ब्याजदर घटाएका छन् ।

असोज महिनामा २० वटा वाणिज्य बैंकको व्यक्तिगत निक्षेपतर्फको औसत अधिकतम ब्याजदर ४.०८९५ प्रतिशत कायम भएको छ । यो भदौ महिनाको औसत ४.१३६ प्रतिशतको तुलनामा ०.०४६५ प्रतिशतविन्दुले कम हो । त्यस्तै, संस्थागत निक्षेपको औसत ब्याजदर पनि भदौको ३.०८१ प्रतिशतबाट ०.०१४५ प्रतिशतविन्दुले घटेर ३.०६६५ प्रतिशतमा झरेको छ ।

असोजमा ब्याजदर घटाउनेमध्ये एभरेष्ट बैंकले सबैभन्दा ठूलो कटौती गरेको छ। बैंकले व्यक्तिगत निक्षेपको अधिकतम ब्याजदर ०.५५ प्रतिशतविन्दुले घटाएर ३.५ प्रतिशत कायम गरेको छ । संस्थागत निक्षेपतर्फको ब्याजदर पनि ०.२५ प्रतिशतविन्दुले घटाएर ३.२५ प्रतिशतमा झारेको छ ।

त्यसैगरी, नबिल बैंकले व्यक्तिगत निक्षेपको ब्याजदर ०.३ प्रतिशतविन्दुले घटाएर ४.२५ प्रतिशत कायम गरेको छ । बैंकले संस्थागत निक्षेपको ब्याजदर भने ३.०१ प्रतिशतमा यथावत राखेको छ ।

स्ट्याण्डर्ड चार्टर्ड बैंकले व्यक्तिगत निक्षेपको ब्याजदर ०.०५ प्रतिशतविन्दुले घटाएर ३.७५ प्रतिशत कायम गरेको छ। कुमारी बैंकले पनि व्यक्तिगत निक्षेपको दर ०.०३ प्रतिशतविन्दुले घटाएर ३.७३ प्रतिशतमा झारेको छ । सिटिजन्स बैंकले संस्थागत निक्षेपको ब्याजदर ०.२५ प्रतिशतविन्दुले घटाउँदै २.७५ प्रतिशत कायम गरेको छ । अर्कोतर्फ, सानिमा बैंकले भने संस्थागत निक्षेपको ब्याजदर ०.२१ प्रतिशतविन्दुले बढाएर ३.५१ प्रतिशत पुर्‍याएको छ। व्यक्तिगत निक्षेपतर्फ भने बैंकले भदौकै ४.५ प्रतिशत ब्याजदरलाई निरन्तरता दिएको छ ।

व्यक्तिगत निक्षेपतर्फ प्रभु बैंकले सबैभन्दा बढी ४.५५ प्रतिशत ब्याजदर कायम गरेको छ। माछापुच्छ्रे बैंक, नेपाल इन्भेष्टमेन्ट मेगा बैंक, एनएमबि बैंक, कृषि विकास बैंक र राष्ट्रिय वाणिज्य बैंकसहित १५ वटा बैंकले भने असोजमा व्यक्तिगत निक्षेपको ब्याजदरमा कुनै परिवर्तन गरेका छैनन् ।

यससँगै असोजमा अधिकांश वाणिज्य बैंकको निक्षेप ब्याजदर स्थिर रहे पनि केही बैंकले गरेको कटौतीका कारण समग्र औसत ब्याजदर भने भदौको तुलनामा सामान्य घटेको देखिएको छ ।